Մետրոպոլիտենի նախկին աշխատակիցները կդիմեն միջազգային ատյաններ
Պարտադիր կուտակային կենսաթոշակային համակարգի դեմ բողոքելու հետևանքով մետրոպոլիտենի երկու տարի առաջ աշխատանքից ազատված աշխատակիցներին՝ աշխատանքի վերականգնելու պահանջով հայցը դեկտեմբերին վճռաբեկ դատարանը մերժել է:
«Ընդդեմ իրավական կամայականության» ՀԿ-ի փաստաբան Քրիստինա Գևորգյանը լրագրողների հետ հանդիպմանը հայտնեց, որ «Դեմ եմ» նախաձեռնության կազմակերպած բողոքի ակցիայի ժամանակ Կ. Դեմիրճյանի անվան Երևանի Մետրոպոլիտենի արդեն նախկին աշխատակիցները՝ Սևակ Հովհաննիսյանը, Գագիկ Գալստյանը, Անդրանիկ Գևորգյանը փորձել են հիմնավորել, թե ինչու են դեմ այդ համակարգին:
«Փետրվարի 13-ին աշխատանքի գնալով, իմ վստահորդները կանչվել են տնօրենի գրասենյակ: Այնտեղ նրանց տեղեկացրել են, որ այլևս չեն կարող աշխատել Մետրոպոլիտենում: Նրանց հետ լուծվել է աշխատանքային պայմանագիրը՝ օրենսգրքի 113 հոդվածի 1-ին մասի 6-րդ կետով՝ վստահությունը կորցնելու հիմքով աշխատանքից ազատելը»,-ասաց փաստաբանը:
Նրա խոսքով, տնօրինությունը հրաժարվել է հիմնավորել, թե ինչու են հենց այդ հիմնավորմամբ ազատել աշխատանքից: Փաստաբանի հարցին ի պատասխան, Մետրոպոլիտենից հայտնել են, որ աշխատանքից հեռացվածները պարբերաբար բացակայել են աշխատանքից, չեն կատարել իրենց վրա դրված պարտականությունները, ինչպես նաև թույլ են տվել կողմնակի մարդկանց մուտք արգելված տարածքներ:
Փաստաբանը վստահեցնում է, որ պատասխանող կողմը դատական նիստերի ընթացքում չի կարողացել պատասխանել հարցերին, թե ովքեր են մուտք գործել, երբ են մուտք գործել:
Աշխատանքից ազատման հրամաններն անվավեր ճանաչելու, աշխատանքը վերականգնելու, պարապուրդում եղած ժամանակահատվածի համար գումարը վճարելու պահանջով դիմել են Արաբկիր և Քանաքեռ Զեյթուն համայնքների ընդհանուր իրավասության դատարան: Գործը մեկ տարի քննելուց հետո դատարանը հրամանները հիմնավոր է համարել, հարկադիր պարապուրդի գումարի մասով հայցը բավարարել:
«Վերաքննիչը աղավաղել է գործի փաստերը»,-դատական պրոցեսը նկարագրեց փաստաբանը:
Անդրանիկ Գևորգյանը որոշումն անարդար է համարում. «Եթե մենք չէինք կատարել աշխատանքները, ինչպես իրենք են ասում, մեր անմիջական ղեկավարը, ստուգելով աշխատանքը, մատյանների մեջ գրառումներ չէր անի ու չէր ստորագրի, աշխատելու ընթացքում որևէ անգամ նախազգուշացման չենք արժանացել»:
Աշխատանքից ազատվածներն ասացին, որ մինչ այս պահը գործ չեն գտել:
«Դատական նիստերի ընթացքում մենք ապացուցեցինք, որ սխալ չենք գործել: Մատյաններում թերացումների մասին գրառումներ չեն եղել: Եթե կողմնակի անձանց են տեսել, ինչու հենց նույն պահին մեզանից բացատրություն չեն պահանջել: Նույն բան է, որ ես հայտարարեմ, թե իմ գրպանից հազար դրամ են գողացել»,-ասաց Գևորգյանը:
Նա նշեց, որ շատ կցանկանային արդարության հասնել հայաստանյան դատարաններում, բայց հիմա ստիպված են դիմել միջազգային ատյաններ: