Առաջին պատասխանատուն, որ ստատուս քվոն շարունակվում է, Ադրբեջանն է. Էդվարդ Նալբանդյան
«Բաքուն բազմիցս օգտագործում է միջազգային հարաբերությունների ոգուն ոչ հարիր արտահայտություններ ուղղված եռանախագահերին, բոլոր նրանց, ովքեր հանդգնում են կարծիք հայտնել, որը չի համապատասխանում ադրբեջանական պաշտոնական կարծիքին: Եռանախագահներին հրապարակային մեկ ասում են, որ տուրիստներ են, մեկ ասում են, որ իսլամաբոֆներ են, ԱՄՆ-ն համարում են կոռուպցիայի ծննդավայր»,- Շվեդիայի արտաքին գործերի նախարար Մարգոտ Վալստրյոմի հետ համատեղ ասուլիսում ասաց ՀՀ արտաքին գործերի նախարար Էդվարդ Նալբանդյանը՝ պատասխանելով հարցին, թե Ադրբեջանի արտգործնախարարը վերջերս իր մեկնաբանություններում արդեն ծաղրում է Մինսկի խմբի համանախագահներին, ասում, որ չեն հանդիպելու նրանց հետ, քանի որ դրա իմաստը պարզապես չկա, բացի այդ Հայաստանին մեղադրում են ստատուս քվոն համառորեն պահելու մեջ, ինչպես կմեկնաբանե՞ք:
Նշենք, որ փետրվարի 8-9-ը ՀՀ արտգործնախարար Էդվարդ Նալբանդյանի հրավերով Շվեդիայի Թագավորության արտաքին գործերի նախարար Մարգոտ Վալստրյոմը պաշտոնական այցով Հայաստանում է:
Ըստ Է.Նալբանդյանի, այս ամենն արվում է, քանի որ Ադրբեջանին թվում է, թե նման պարզունակ, «վարկաբեկիչ» հայտարարություններով կարող են շանտաժի ենթարկել եռանախագահներին, այլոց և ինչ որ մի բան կորզել:
«Զարմանալի է, որ իրենք դասեր չեն քաղում, որովհետև հակառակ էֆեկտն է տալիս, միջազգային հանրության կարծիքը, դիրքորոշումը տարեցտարի ավելի հասցեական ու ակնհայտ է դառնում»,- ասաց ՀՀ ԱԳ նախարարը:
Ինչ վերաբերում է այն մեղադրանքներին, թե Հայաստանը ցանկանում է ստատուս քվոն պահպանել, Է.Նալբանդյանն ասաց, որ Հայաստանը, եռանախագահները շահագրգիռ են ստատուս քովայի փոփոխման. «Առաջին պատասխանատուն, որ ստատուս քվոն շարունակվում է, Ադրբեջանն է: Ինչպե՞ս կարելի է ստատուս քվոն փոխել: Կարելի է փոխել բանակցությունների միջոցով, պայմանավորվածությունների ձեռք բերման միջոցով: Իսկ ո՞վ է ցրում իրավիճակը, Ադրբեջանը, որ չի արձագանքո՞ւմ եռանախագահների կոչերին, որ պետք է վերահաստատել հանձնառությունը բանակցային, խաղաղ ճանապարհով հիմնախնդրի կարգավորման վերաբերյալ, ո՞վ է դեմ դուրս գալիս հետաքննության մեխանիզմի ստեղծմանը: Ադրբեջանը հորինել է, որ եթե մեխանիզմը ստեղծվի, ապա դա կնպաստի ստատուս քվոյի պահպանմանը: Ճիշտ հակառակը, եթե ստեղծվի, դա կլինի ոչ միայն հետաքննության, կանխարգելիչ մեխանիզմ, թույլ կտա ապահովել ավելի բարենպաստ պայմաններ բանակցությունների շարունակման համար, բանակցությունների միջոցով կհասնենք պայմանավորվածության հիմնախնդրի կարգավորման վերաբերյալ»:
Հայաստանի արտգործնախարարը հույս հայտնեց, որ Ադրբեջանում վերջապես կհասկանան, որ այս կեցվածքն իրենց որևէ առավելություն չի տալիս, հակառակը, իսկ Հայաստանը եռանախագահների հետ շարունակելու է գործադրել ջանքեր՝ ուղղված հիմնախնդրի բացառապես խաղաղ կարգավորմանը, քանի որ բանակցություններին այլընտարնք չկա:
Հարակից հրապարակումներ`
Լրահոս
Տեսանյութեր
Եթե Ադրբեջանը վստահ է, ինչո՞ւ է դատական գործընթացները դադարեցնելու մասին գաղափար առաջ քաշում
