ԲՀԿ-ն Օմբուդսմենի թեկնածու չի առաջադրի

Քաղաքական 16:19 09/02/2016

ԲՀԿ-ն Օմբուդսմենի թեկնածու չի առաջադրի

Մարդու իրավունքների պաշտպանի պաշտոնում ԱԺ պետա-իրավական հարցերի մշտական հանձնաժողովում առաջադրման համար փաստաթղթեր ներկայացրած թեկնածուներն այս պահի դրությամբ 2-ն են` Արման Թաթոյանը և Զարուհի Փոստանջյանը:

Սպասվում էր, որ թեկնածու կառաջադրի նաև ԱԺ «Բարգավաճ Հայաստան» խմբակցությունը, հայտարարվել էր ԲՀԿ –ական իրավաբան Մակար Եղիազարյանի թեկնածությունը: Ավելին, «Բարգավաճ Հայաստան» խմբակցությունից դուրս եկած Տիգրան Ուրիխանյանի հետ, ինչպես Զոհրաբյանը տեղեկացրեց, ունեցել են նախնական պայմանավորվածություն, որ կներկայացնեն Եղիազարյանի թեկնածությունը, սակայն Ուրիխանյանը առայժմ հապաղում է փաստաթղթեր ներկայացնել հանձնաժողովին:

«ԱԺ պետա-իրավական հանձնաժողովում «Բարգավաճ Հայաստան» խմբակցությունը ներկայացնում է Տիգրան Ուրիխանյանը, մենք նախնական քննարկում էինք ունեցել նրա հետ, որ կներկայացնենք Մակար Եղիազարյանի թեկնածությունը: Բայց այս պահի դրությամբ, որքան տեղյակ եմ պարոն Ուրիխանյանը պետա-իրավական հանձնաժողովից չի վերցրել անհրաժեշտ թղթերը Մակար Եղիազարյանին ներկայացնելու համար: Եթե չներկայացնի, ապա տեխնիկապես էլ ժամանակ չի մնում, քանի որ այսօր մինչև ժամը 18:00-ն է առաջադրման ժամկետը», -այսօր լրագրողների հետ զրույցում հայտարարեց Նաիրա Զոհրաբյանը:

Այդուհանդերձ, ըստ Զոհրաբյանի, եթե Ուրիխանյանը համապատասխան փաստաթղթերը չվերցնի և թեկնածու չներկայացնի, ինքը գրություն կուղարկի ԱԺ պետա-իրավական հարցերի մշտական հանձնաժողովի նախագահ Հովհաննես Սահակյանին` ներկայացնելով իրենց թեկնածուին:

«Եթե կա իրավական, կանոնադրական որևէ հնարավորություն, ապա քննարկել Մակար Եղիազարյանի թեկնածությունը», -նկատեց պատգամավորը:

Հարակից հրապարակումներ`

ԲՀԿ-ն ունի Օմբուդսմենի իր թեկնածուն

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: