Ձեր վստահելի աղբյուրը

«130 դպրոցի դժգոհությունը տեղին է, ես այն ոչ թե կիսում եմ, այլ բազմապատկում», -Panorama.am-ի թղթակցի հետ զրույցում ասաց Կրթության Ազգային ինստիտուտի փոխտնօրեն Անահիտ Բախշյանը` մեկնաբանելով թիվ 130 դպրոցի տնօրինության մտահոգությունը դպրոցների վարկանիշավորման արդյունքներից:

Բախշյանի խոսքով, ներկայիս տնօրենի աշխատելու տարիներին դպրոցը զգալիորեն փոխվել է, և նախորդ տարիներին նույն վարկանիշավորման աղյուսյակում ամենավերին հորիզոնականները զբաղեցրած դպրոցը չպետք է հայտնվեր 251-րդ հորիզոնականում:

«Շատ տարօրինակ է, շատ զարմանալի», -փոխանցեց Բախշյանը: Նա դպրոցի տնօրինությանը հորդորեց հետամուտ լինել իրենց առաջ քաշած հարցադրումներին, գնալ Կրթական տեխնոլոգիաների ազգային կենտրոն, որտեղ հավաքվում են բոլոր տվյալները, և հասկանալ, թե ինչու է այնպես ստացվել, որ իրենք նախորդ տարիներին վարկանիշավորման արդյունքներով վերին հորիզոնականներում էին, իսկ այս տարի` 251-րդում:

Նշենք, որ Երևանի Նաիրի Զարյանի անվան թիվ 130 հիմնական դպրոցի տնօրինությունը այսօր հայտարարություն էր տարածել, որով մտահոգություն էր հայտնել հրապարակված արդյունքների վերաբերյալ ու մի քանի հարցադրում արել. «Որտե՞ղ է այն թերությունը, որի հետևանքով Նաիրի Զարյանի անվան հ. 130 հիմնական դպրոցը հայտնվել 251 հորիզոնականում, ի՞նչ կարգով է հաշվարկվում վարկանիշը, եթե վարկանիշավորման մեթոդաբանության մեջ նշված կետերին համապատասխան ներկայացված աճած թվերը խայտառակ կերպով իջեցնում են դպրոցի վարկանիշը՝ ստվերելով կատարած մեծ աշխատանքը»:

«Համոզված եմ, որ այդ դպրոցը չէր կարող այդքան զիջել դիրքերը, այն դեպքում, երբ իսկապես երևում է կատարված մեծ աշխատանքը: Այդ դպրոցն հիմա ծաղկում է, ինչպես կարող է նման բան լինել: Այդ դպրոցի հետ կապված վարկանիշին ես չեմ հավատում», -հավելեց տիկին Բախշյանը` չբացառելով, որ հնարավոր է վարկանիշավորման գործընթացում տեխնիկական խնդիրներ առաջացած լինեն:

Վարկանիշավորումը հանրակրթական դպրոցների միջև մրցակցությունը բարձրացնելու նպատակ ունի, ինչը, ըստ մասնագետի, չպետք է լինի ինքնանպատակ: Դրա հիմքում ընկած են հետևյալ չափորոշիչները` սովորողների ցուցանիշների գնահատումը, ուսուցիչների վերաբերյալ ցուցանիշները, ներդպրոցական ակտիվությունը, կարևորվում է աշակերտական խորհրդի դերը և կառավարման արդյունավետությունը:

«Վարկանիշավորումը պետք է բացահայտի դպրոցների թույլ կողմերը դժվարությունները, որն է ուժեղ և ինչու է ուժեղ, իսկ ուժեղները պետք է օրինակ հանդիսանան թույլերի համար», -ներկայացրեց մեր զրուցակիցը:

Դիտարկմանը, թե թիվ 130 դպրոցի պարագայում եթե պարզվի, որ տեխնիկական պատճառներով է այն հայտնվել ստորին հորիզոնականներում, ապա վարկանիշավորման գործընթացի նկատմամբ վստահությունը կորում է, տիկին Բախշյանը համաձայնեց. «Փաստորեն, այդպիսով ընկնում է հեղինակությունը, կատարված ամբողջ աշխատանքը ընկնում է ջուրը»:

Հարցին, թե 2013-ից շարունակվող հանրակրթական դպրոցների վարկանիշավորման գործընթացը արդյոք օգնե՞լ է, որ բարելավվի դպրոցների վիճակը, Բախշյանը պատասխանեց.

«Չի օգնել: Ընդհանրապես վարկանիշավորումը ընդհանուր նպատակ պետք է ունենա դրա արդյունքները պետք է նախարարությունը, մարզպետարանները քաղաքապետարանը ստուգեն և հասկանան, թե ինչու է ընկել դպրոցի վարկանիշը, գտնեն պատճառները ու զբաղվեն դրանց վերացնելով»:

ԿԱԻ փոխտնօրենը նաև ասաց, որ թիվ 130 դպրոցի օրինակին կարող են հետևել նաև մյուս դպրոցները, ովքեր դժգոհ են իրենց վերաբերյալ վարկանիշավորման արդյունքներից:

«Դա միայն ողջունելի է», -նկատեց նա: