Ձեր վստահելի աղբյուրը

«Ես քննարկել եմ Փոստանջյանի հետ նրա թեկնածությունն առաջադրելու մասին հարցը ու ունեմ նրա գրավոր համաձայնությունը, չեմ  կարծում, որ այդ հարցը պետք է քննարկեի «Ժառանգություն» կուսակցության հետ», -այսօր Ազգային ժողովի պետական-իրավական հարցերի մշտական հանձնաժողովում հայտարարեց ԱԺ պատգամավոր Էդմոն Մարուքյանը` ներկայացնելով իր առաջադրած թեկնածու Զարուհի Փոստանջյանին:

Պատասխանելով Հանրապետական խմբակցության քարտուղար Գագիկ Մելիքյանի հարցին, թե ինչ հարաբերություններ ունեն Մարուքյանի ղեկավարած «Լուսավոր Հայաստան» և «Ժառանգություն» կուսակցությունները, Մարուքյանը պատասխանեց, որ Մարդու իրավունքների պաշտպանի պաշտոնը քաղաքական պաշտոն չէ, և իր առաջադրումը քաղաքական մոտիվացիաներով պայմանավորված չէ:

«Ես առաջադրել եմ մարդու, որը ունակ է պաշտպանել մարդկանց իրավունքները: Եթե լուրջ չեք վերաբերվում էդ հարցին, ինչո՞ւ եք այսքան խառնվել», -հայտարարեց Մարուքյանը:

Պատգամավորի խոսքով, եթե ընդունենք, որ ճիշտ են հայտարարությունները, թե Հայաստանում օմբուդսմենները ճնշումների են ենթարկվում, ապա Փոստանջյանի պարագայում այդ ժնշումները չեն ազդի:

«Զարուհի Փոստանջյանը ունի բավարար խիզախություն չենթարկվելու ճնշումներին, եթե Հայաստանում կա նման պրակտիկա, ապա Փոստանջյանը չի ենթարկվի որևէ ճնշման: Վստահ եմ», -հավելեց Մարուքյանը:

Մարուքյանի ներկայացմամբ, Փոստանջյանը հայտնի է իր իրավապաշտպան գործունեությամբ:

«Մարդու իրավունքների պաշտպանության հետ կապված նրա մոտեցումները ես ամբողջությամբ կիսում եմ: Իմ հիշողության մեջ նա տպավորված է որպես խիզախ կին, որը պատրաստ է գտնվել ցանկացած տեղ: Խնդրում եմ քվեարկել նրա օգտին և հնարավորություն տալ այդ ինստիտուտը ներկայացնելու նախկին ընդդիմադիրի, քանի որ պաշտոնին անցնելուց հետո նա պարտավորվելու է վայր դնել իր բոլոր լիազորությունները»,- նշեց Մարուքյանը: