Ձեր վստահելի աղբյուրը

Հասարակական վայրերում, պետական, մասնավոր հիմնարկներում տեղադրված տեսախցիկներով արձանագրված տեսագրությունները պետք է օգտագործվեն այն նպատակով, որի համար տեղադրվել են: Այդ մասին այսօր լրագրողների հետ հանդիպման ժամանակ հայտարարեց ԱՆ անձնական տվյալների պաշտպանության գործակալության պետ Շուշան Դոյդոյանը:

«Այսօր լայն տարածում է գտել տեսահսկման խնդիրը և յուրաքանչյուր քայլափոխի, հասարակական վայրերում, ռեստորաններում, սրճարաններում, պետական, մասնավոր մարմիններում ամեն քայլափոխի ենթարկվում ենք տեսահսկման: Բայց այդ տեսահսկումը որևէ կարգավորման չի ենթարկվում», -հայտարարեց Դոյդոյանը` նկատելով, որ Ճանապարհային ոստիկանությունն է միայն, որ իրավական կարգավորումների հիման վրա է տեսագրում իրականացնում:

Պաշտոնյան ներկայացրեց մի նախադեպ, երբ ընկերությունը քաղաքացուն տուգանել էր ոչ ճիշտ ապացույցների հիման վրա: Նրա ներկայացմամբ, «Փարքինգ Սիթի Սերվիսը» քաղաքացուն տուգանել էր անօրինական կայանման համար և դրա համար որպես ապացույց ներկայացրել բոլորովին այլ տեսախցիկով արված տեսագրությունը:

Մինչդեռ, ըստ Դոյդոյանի, Անձնական տվյալների պաշտպանության մասին օրենքը հստակ սահմանում է, որ անձնական տվյալը կարող է օգտագործվել միայն այն նպատակով, ինչ նպատակով այն հավաքվում ու մշակվում է: Այս գործով քաղաքացու բողոքի հիման վրա վարչական վարույթ է հարուցվել և շուտով արդյունքների մասին հայտնի կլինի:

«Այս կոնկրետ դեպքում քաղաքացին վիճարկում է ոչ թե իրեն անօրինական տուգանելը, այլ վիճարկում է ապացույցների օրինականությունը` նշելով, որ այն տեսագրությունը, որն ընկած է հենց իրեն տուգանելու հիմքում, անօրինական է օգտագործվել, որովհետև դա տեսագրվել է, որպեսզի ապահովի այդ տարածքի անվտանգությունը, մինչդեռ օգտագործվել է, որպեսզի իրեն տուգանեն: Այսինքն, օրինականության նպատակի սկզբունքը խախտվել է տվյալ դեպքում, քաղաքացին խնդրել է, որպեսզի վարչական վարույթ հարուցվի ու մենք տանք մեր գնահատականը», -գործը ներկայացրեց Դոյդոյանը:

Այդուհանդերձ, ըստ գործակալության պետի, անկախ նրանից, թե տեսագրությունն իրականացվում է մասնավոր կամ պետական հատվածում ինչ նպատակներով, որ տեղադրվել է տեսախցիկը, հենց այդ նպատակով էլ պետք է օգտագործվի:

«Ենթադրենք տեսախցիկը դրված է, որպեսզի տվյալ տարածքում անձանց կամ գույքին պատճառվող վնասը կանխվի, ուրեմն պետք է հենց այդ նպատակով օգտագործվեն այն տեսագրությունները, որոնք հավաքված են: Չի կարող այդ նպատակով հավաքված տեսագրությունը օգտագործվել տվյալ վայրի աշխատակցին կարգապահական տույժի ենթարկելու նպատակով, եթե նա աշխատանքից ուշ է եկել, որովհետև այդ տեսախցիկը այդ նպատակով չէր տեղադրվել: Իսկ եթե տեսախցիկը տեղադրվում է, օրինակ, աշխատողների ճիշտ ժամանակին գալ-չգալը հետևելու համար, ապա այդ մասին պետք է բոլոր աշխատողները տեղեկացված լինեն, որպեսզի հասկանան` ինչ է սպասվում իրենց տեսախցիկի տեղադրման արդյունքում»,- ներկայացրեց Շուշան Դոյդոյանը:

Նա տեղեկացրեց, հանրության դատին են ներկայացրել ուղեցույց, որտեղ նկարագրել են տեսահսկման սարքերի վերաբերյալ մանրամասները: Ուղեցույցը տարածվել է փետրվարի 12-ին ու սպասում են հասարակական կազմակերպությունների կարծիքին: