Թուրքիան հայտնվել է փակուղային իրավիճակում. Լևոն Հովսեփյան
«Վերջին շրջանում Սիրիայի հետ կապված տեղի են ունենում ուշագրավ, բավականին բարդ գործընթացներ: Այս առումով Թուրքիան հայտնվել է բարդ, փակուղային իրավիճակում, քանի որ Սիրիայի հետ կապված Թուրքիայի պլանները, հաշվարկները, այն հսկայական ռեսուրսները, որոնք Թուրքիան դրել էր սիրիական հիմնախնդրի համատեքստում, ձախողվում են»,- լրագրողների հետ հանդիպման ժամանակ նման տեսակետ հայտնեց թուրքագետ Լևոն Հովսեփյանը:
Ըստ նրա, ստեղծված իրավիճակը լրջորեն անհանգստացնում է պաշտոնական Անկարային: Թուրքագետի խոսքով, Սիրիայի հյուսիսում քրդական ուժերի դեմ վերջին գործողությունները պետք է դիտարկել մի քանի տեսանկյունից. «Առաջին, քրդերի հրետակոծությունն այս իրավիճակում շանտաժի տարրեր էին պարունակում ուղղված ԱՄՆ-ի դեմ: Սրանով Թուրքիան փորձում էր ցույց տալ, հասկացնել իր վճռականությունը ԱՄՆ-ին: Երկրորդ՝ Թուրքիան ավելի մեծ հավակնություններ ունի, և այդ հավակնությունների ձախողման ֆոնին փորձում է ինչ -ինչ նպաստվոր պայմաններ ապահովել իր համար»:
Ըստ Լ. Հովսեփյանի, Անկարային բավական մտահոգում է, որ ԱՄՆ-ն ու ՌԴ-ն կարող են համաձայնության գալ սիրիական հիմնախնդրի հետ կապված և այս առումով Անկարան կարող է մնալ խաղից դուրս:
«Անկարան փորձում է տարբեր միջոցներ օգտագործելով՝ ինչ-ինչ խնդիրներ լուծել: Առաջին քայլը քրդական ուժերի դեմ հրետակոծություններ էր, Սիրիայի հյուսիսում թուրքական հրետանային միջոցների կիրառումն էր»,- ասաց նա՝ հավելելով, որ Սիրիայի շուրջ օղակը սեղմվում էր և այս առումով Անկարան կարող է ավելի անկանխատեսելի դառնալ իր գործողությունների, քաղաքականության մեջ:
Նրա խոսքով, ստեղծված իրավիճակում Անկարան որոշակի երկընտրանքի առջև է կանգնած՝ կամ պետք է գնալ վճռական ինչ-ինչ գործողությունների, որպեսզի իր համար այս բացասական ձախողումները կանխի կամ պետք է սպասի. «Երկու պարագայում էլ Թուրքիայի համար կորուստներն ակնհայտ կլինեն, բավական վտանգավոր կլինի Թուրքիայի կողմից ցամաքային գործողությունները ոչ կոալիցիայի շրջանակներում»:
Լ. Հովսեփյանը նշեց, որ Թուրքիայի համար տվյալ պարագայում գերխնդիրը ինչ-ինչ գործողություններ ապահովելն է, սակայն դեռևս վտանգավորությունը և ֆորմատի անորոշությունը հաշվի առնելով՝ զերծ է մնում նման քայլից:
«Այս պահին Թուրքիայի նպատակն է Սաուդյան Արաբիայի հետ ինչ-ինչ քայլեր ձեռնարկել: Դրանցից մեկը Թուրքիայի միջոցով զինյալների խմբաքանակի ուղարկումն է Սիրիա: Տարբեր պլաններ փորձարկում են իրավիճակը որոշ հատվածներում իրենց վերահսկողության տակ պահելու համար»,- ասաց թուրքագետը:
Լրահոս
Տեսանյութեր
Հայաստանի ու հայ ժողովրդի շահերը պաշտպանող իշխանություն գոյություն չունի. Բագրատ Սրբազան
