Ձեր վստահելի աղբյուրը

Տերյան մշակութային կենտրոնը, որը 13 տարի գործունեություն է ծավալել  հայկական տարազներ ստեղծելու և վերստեղծելու գործում, այժմ ստեղծել է ժամանակակից, արդի ձևածքներով, կրելի հագուստների իր հավաքածուն՝ կիրառելով հայկական միջնադարյան գորգերի թանգարանային նմուշների նախշեր ու հորինվածքներ: Panorama.am-ի հետ զրույցում ասաց Տերյան մշակութային կենտրոնի PR մենեջեր, արվեստաբան Անի Մարգարյանը:

«Հագուստների տարբեր մասերում հայկական գորգի թանգարանային նմուշի լուսանկարները պրիտ են արված, այսինքն գորգերի հորինվածքները խախտված չեն: Այսկերպ նաև քարոզում ենք հայկական գորգը»,- ասաց նա՝ հավելելով, որ ընտրել են հայկական ամենահայտնի գորգերը՝ «Արծվագորգ», «Վիշապագորգ», «Խնձորեսկ», «Ամարաս»:

Ինչո՞ւ մշակութային կենտրոնը որոշեց հիմա ստեղծել նման հավաքածու: Ըստ Ա.Մարգարյանի, ուսումնասիրությունների համաձայն, վերջին տարիներին էթնիկ մշակույթները հայտնվել են համաշխարհային ճանաչում ունեցող մոդելավորողների ուշադրության կենտրոնում:

Հավաքածուն, նրա խոսքով, իրենից ներկայացնում է թրենդային հագուստներ. «Կարծում ենք՝ ինչպես հայաստանցի նորաձև աղջիկներն ու կանայք, հույս ունենք նաև օտարազգի կանայք ու աղջիկները, կցանկանան կրել այս հագուստները»:

Հավաքածուն բաղկացած է 40 կտոր հագուստից, նույնքան զարդեղեն, պայուսակներ, կոշիկներ:

Նշենք, որ փետրվարի 19-ին Մեգերյան կարպետի ցուցասրահում կազմակերպվելու է այդ հագուստների հավաքածուի ցուցադրությունը՝ «Անցյալի ապագա» խորագրով:

Պատասխանելով հարցին, թե  ցուցադրությունից հետո որտեղի՞ց կարելի է ձեռք բերել այդ հագուստները, Ա.Մարգարյանն ասաց, որ դեռևս չեն  մտածել այդ ուղղությամբ. «Չգիտենք՝ արձագանքն ինչպիսին կլինի: Ցուցադրությունն ամեն ինչ ցույց կտա»: