Ձեր վստահելի աղբյուրը

Փետրվարի 24-ին Գերմանիայի դաշնային խորհրդարանում կքննարկվի Հայոց ցեղասպանության ճանաչման խնդիրը: Այս մասին գրում է  «Էրմենիհաբեր»-ը՝ վկայակոչելով թուրքական «Gerçekgündem.com» լրատվան կայքին:

Ըստ աղբյուրի, ցեղասպանության վերաբերյալ նախագծերը ներկայացրել են Գերմանիայի խորհրդարանի «Ձախերի» ("Die Linke")  և «Կանաչների» ("Die Grüne") կուսակցությունները: Փետրվարի  24-ին խորհրդարանական քննարկումների ժամանակ այդ նախագծերի քննարկմանը կտրամադրվի 38 րոպե:

Աղբյուրը հիշեցնում է, որ անցյալ տարի Գերմանիայի դաշնային խորհրդարանն Օսմանյան կայսրությունում հայերի զանգվածային կոտորածները բնութագրել էր որպես ցեղասպանություն: Թեմայի առնչությամբ համատեղ տեքստ մշակելու նպատակով իշխանությունն ու ընդդիմությունը որոշում էին կայացրել՝ նախագծերը Արտաքին հարաբերությունների և մարդու իրավունքների հանձնաժողովին փոխանցել մասին:

Գերմանիայի խորհրդարանի նախագահ Նորբերթ Լամերտը  2015թ. մարտին հետևյալ հայտարարությունն էր արել.«Օսմանյան կայսրությունում առաջին համաշխարհային պատերազմի ժամանակ՝ ողջ աշխարհի աչքի առաջ տեղի ուենցածը ցեղասպանություն էր: Եվ դա 20-րդ դարի վերջին ցեղասպանությունը չէր»:

Իսկ «Կանաչների» կուսակցության համանախագահ Ջեմ Օզդեմիրը, հիշեցնելով, որ հայոց զանգվածային ջարդերը ցեղասպանություն են որակել և Գերմանիայի նախագահը, և խորհրդարանի նախագահը, նշել է.

«Անհրաժեշտ է, որպեսզի ամեն մեկը ձեռքն իր խղճին դնի ու հարցնի՝ եթե այդ մարդիկ չմեռնեին, ինչպիսի՞ն կլիներ այսօրվա Թուրքիան: Այսինքն, եթե հայերը, ասորիները, հույները ապրեին, Թուրքիան բազմամշակույթ լիներ, շա՞տ վատ կլիներ: Ոչ, ընդհակառակը, այս առումով Թուրքիան շատ բան է կորցրել»:

«Ցեղասպանություն իրականացրած երիտթուրքերը Սարիղամիշում թուրք զինվորներին էլ են ոչնչացրել: Երիտթուրքերն են կործանել Օսմանյան կայսրությունը: Հետևաբար, նրանց պաշտպանելն անիմաստ է: Յուրաքանչյուրը պետք է հարցնի ինքն իրեն, թե ումից է ցանկանում օրինակ վերցնել»: