Ձեր վստահելի աղբյուրը

«ՀԱԿ-ն անհանդուրժելի, անընդունելի է համարում հարձակումները լրագրողների նկատմամբ, ինչ հարաբերություններ էլ պատգամավորներն ունենան լրագրողների հետ՝ սիրես, չսիրես, որևէ նշանակություն չունի: Լրագրողը կատարում է իր պարտականությունները և եթե, առավել ևս դու պատգամավոր ես, դու պարտավոր ես օգնել լրագրողին իր պարտականությունների կատարման գործում»,- Ազգային ժողովում լրագրողների հետ զրույցում ասաց ՀԱԿ խմբակցության ղեկավար Լևոն Զուրաբյանը՝ պատասխանելով  հարցին, թե ինչպե՞ս կգնահատեք ԱԺ ՀՀԿ խմբակցության անդամ Մհեր Սեդրակյանի վերաբերմունքը լրագրողների հանդեպ, մասնավորապես հայհոյելու փաստը:

Դիտարկմանը, թե որոշ պատգամավորներ գողական են գնում ԱԺ-ում, Զուրաբյանն արձագանքել է. «Դե հիմա ինչ անենք, որ գողերի պառլամենտ է: Դե եթե գողական իշխանություն ունեք, պառլամենտն էլ պետք է գողական լինի: Չեմ կարծում, որ այդտեղ անակնկալ կա որևէ մեկի համար»:

Լ.Զուրաբյանի խոսքով, ՀԱԿ-ը միշտ էլ համերաշխ է լինելու լրագրողների հետ, որովհետև խոսքի ազատությունը եղել է, կա և լինելու է իրենց դավանած ամենամեծ արժեքներից մեկը, պատրաստ են աջակցել խոսքի ազատության զարգացմանը, այդ իրավունքն ամրապնդելուն:

Պատասխաելով հարցին, թե արդյո՞ք  կուսակցությունը պետք է պատասխանատվություն կրի իր կուսակցի նման վարքագծի համար, ՀԱԿ պատգամավորն ասաց, որ պատասխանատու է:

«Իրենք պետք է ներքին հետաքննություն անցկացնեն, իրենք պետք է պատժամիջոցներ ձեռնարկեն իրենց կոլեգայի նկատմամբ՝ ընդհուպ մինչև կուսակցությունից դուրս հանելը»,- ասաց Լ.Զուրաբյանը: