Ձեր վստահելի աղբյուրը

«Առաջարկում եմ խորհրդարանի անունից բացատրություն պահանջել ոստիկանությունից, դատախազությունից Վարդգես Գասպարիի ապօրինի ազատազրկման համար և ներկայացրել ձեռք բերված տեղեկությունները»,- Ազգային ժողովում դիմելով ԱԺ փոխնախագահ Էդուարդ Շարմազանովին՝ ասաց ԱԺ ՀԱԿ խմբակցության ղեկավար Լևոն Զուրաբյանը: 

Նա նշեց, որ Վարդգես Գասպարիին կալանավորել են միայն նրա համար, որ իշխանությունների կամայականությունների դեմ բողոքի ակցիաներ է կազմակերպում:

Հիշեցնենք, որ դատարանը որոշել էր կալանավորել Գասպարիին` դատաքննությանը չներկայանալու պատճառաբանությամբ: 

ԱԺ փոխնախագահն ասաց, որ քաղաքական բանտարկյալները ցանկացած ժողովրդավարական երկրում անթույլատրելի են:

«Հայաստանում տեսել ենք ժամանակաշրջան, երբ ունեցել ենք քաղբանտարկյալներ:  Այդ ժամանակները վաղուց անցյալում են, մնացել են նախորդ դարում»,- նշեց Է.Շարմազանովը՝ հավելելով, որ իրենք իրավունք չունեն միջամտել այն գործառույթներին, որտեղ կա օրենք:

Նաև ասաց, եթե նկատեն, որ օրենքում  խախտում կամ կամայականության դրսևորում կա, խորհրդարանը, առաջին հերթին մեծամասնությունը, իր կարծիքը կարտահայտի:

«Իմ հորդորն է ձեզ՝ ցանկացած իրավական խնդրում չտեսնել քաղաքական ենթատեսք: Իմ համոզմամբ, այս հարցում քաղաքական ենթատեքստ չկա: Կոչ եմ անում դատավորի կամ դատախազի ֆունկցիա չվերցնել ձեր վրա»,- դիմելով Լ. Զուրաբյանին՝ ասաց  Է. Շարմազանովը:

Զուրաբյանն իր հերթին ասաց, որ զարմացած է ԱԺ փոխնախագահի հակազդեցությունից. «Ձեր պահվածքով ավելի անհանդուրժելի վերաբերմունք դրսևորեցիք, քան ունենում էր Գալուստ Սահակյանը, ով աչքի էր ընկնում հանդուրժող, համբերատար մոտեցումով: Իսկ դուք սովորական հարցը վերածում եք պրոպագանդի: Ես, առանց որևէ մեկին մեղադրելու, ոչ էլ ասում եմ միջամտեք,  ընդամենն ասում եմ, որ ոստիկանությունից, դատախազությունից տեղեկություններ ուզեք, հայտնեք խորհրդարանին: Այստեղ միջամտության ի՞նչ  հարց կա: Ոչ մի հարց չկա, ընդամենը ցույց կտայիք, որ Ազգային ժողովը կանգնած է դեմոկրատական արժեքների պաշտպանության թիկունքում»:

Հիշեցնենք, որ ԱԺ նախագահը առողջական խնդիրներ ունենալու պատճառով մի քանի օրից նոր կվերադառնա աշխատանքի: