Ձեր վստահելի աղբյուրը

Դպրոցական, բուհական համակարգի որակի գնահատման գործիքներից նորարարը համարվում է վարկանիշավորման նոր համակարգը, որը ստեղծվել է տարիներ առաջ և  Հայաստանում բավականին մեծ արդյունավետությամբ օգտագործվում է որպես կրթության որակի չափման մեթոդներից մեկը: Ազգային ժողովում կառավարության հետ հարցուպատասխանի ժամանակ ասաց կրթության և գիտության նախարար Արմեն Աշոտյանը՝ ի պատասխան ԱԺ ՀՀԿ խմբակցության պատգամավոր Ռուզան Մուրադյանի հարցի, թե վերջերս ԿԳՆ-ի կողմից  հապարակված դպրոցների վարկանիշավորման արդյունքները որոշակի հարցադրումներ են առաջացրել  դպրոցների տնօրենների, մանկավարժների, ծնողների շրջանում:

«Ուզում են հասկանալ, ինչպե՞ս է ստացվել, որ տեսչական ստուգումների արդյունքում իրենց դպրոցի ցուցանիշը շատ ավելի բարձր է, վարկանիշավորման արդյունքում՝ ավելի ցածր: Արդյո՞ք նախարարության  իրականացրած երկու կարևորագույն գործառույթը՝ տեսչավորում և վարկանիշավորում, իրար հետ կապ չունեն, արդյո՞ք տեսչավորման արդյունքները  վարկանիշավորման մեջ հիմք կարող են ունենալ, թե ո՞չ»,- հետևյալ հարցադրումներով հանդես եկավ Ռ.Մուրադյանը:

Ըստ նախարարի, վարկանիշավորումը լավագույն գործիքն է համակարգի հանդեպ հանրության վստահության բարձրացման տեսակետից, հնարավորություն է տալիս հասարակական հսկողություն, թափանցիկություն սահմանել, հանրությանը վստահելի տեղեկատվություն հաղորդել:

«Եթե այս համակարգի շնորհիվ ինչ-որ մի դպրոց, որ նախկինում իրեն համարում էր շատ լավը, կամ ինչ-որ մի տնօրեն, ով քիչ թե շատ ծանոթ մարդ ուներ, համբավ շրջապատում, իր դպրոցը չի տեսնում  առաջին տաս, քսան կամ երեսուն դպրոցների ցանկում, չի նշանակում, որ խաթարել ենք տվյալ տնօրենի մանկության երազանքը: Դա նշանակում է, որ մենք հաշվել ենք, տվել ենք այդ տնօրենին քարտեզ շուրջ 60 ցուցանիշով, որպեսզի կարողանա հասկանալ, թե իր դպրոցը որտեղ է կաղում, որտեղ է առաջատար:  Հետևաբար, այդ համակարգը գերազանցիկների հայտնաբերման համակարգ  չէ, ավելի շատ ախտորոշիչ համակարգ է, որը խելացի կիրառման դեպքում շատ օգտակար կարող է լինել տնօրենների համար»,- ասաց կրթության և գիտության նախարարը:

Ա.Աշոտյանի խոսքով, տեսչական գործառույթը նպատակ է հետապնդում հետևել բացառապես օրինականության խնդիրներին: 

«Այս գործառույթի մեջ, ըստ Հայաստանի օրենսդրության, գերակա է պահպանման հարցը: Այսինքն, կարող են առաջանալ վիճակներ, երբ դպրոցում հայտնաբերվի, որ դասավանդում է  մարդ, ով դրա իրավունքն օրենքով  չունի, բայց նա վատ մակավարժ չէ, լավ է դասավանդում»,- բացատրեց նախարարը՝ հավելելով, որ այս երկու ստուգումները կրթական համակարգում տարբեր երեսներ են բացահայտում: