Ձեր վստահելի աղբյուրը

Առհասարակ Հայաստանի խորհրդարանական ուժերի մեջ չկա գեթ մեկը , որը երբևէ իշխանություն չի եղել: Այս մասին ՀՀԿ  և ՀՅԴ կուսակցության միջև կնքված  Քաղաքական համագործակցության համաձայնագրի ստորագրումից հետո պատասխանելով լրագրողների հարցին, թե ինչպես կբացատրեն տևական ժամանակ ընդդիմադիր կեցվածք ունեցող ՀՅԴ կուսակցության իշխանության գալը՝ ասաց ՀՀԿ նախագահի տեղակալ Արմեն Աշոտյանը:

«Հետևաբար, հարցադրումը նորագույն պատմության տեսակետից գոյություն չպետք է ունենա,  քանի որ իշխանությունը-ընդդիմությունը մարդիկ չեն, նրանք առաջին հերթին ինստիտուտներ են, որտեղ քաղաքական ուժերը հայտնվում են, երբ իրենց ծրագրային դրույթներով կարողանում են շահել այս կամ այն ընտրողի վստահությունը: Մեր համագործակցությունը հանուն մարդու և պետության է, իսկ այդ բաժանումը ընթացիկ քաղաքական է, այլ ոչ թե արժեհամակարգային»,-նշեց Աշոտյանը:

Հարցին, թե արդյոք Դաշնակցության նկատմամբ վստահությունը չի փոխվի, Արմեն Աշոտյանը մեջբերեց ՀՀ նախագահի ելույթից այն հատվածը, թե որևէ քաղաքական ուժ կամ անհատ չի կարող երաշխավորված լինել գալիք խորհրդարանական ընտրություններին:

«Բոլորը՝ թե մարդիկ, թե քաղաքական ուժերը պետք է աշխատեն, այդ թվում՝ ՀՀԿ-ն և ՀՅԴ-ն»,- ասաց Աշոտյանը:

Աղվան Վարդանյանն էլ նշեց, որ Դաշնակցությունը մշտապես կողմնակից է եղել պատասխանատվություն ստանձնելուն և աշխատանքով ապացուցելու արդյունավետությունը: 

«Մենք համոզված ենք, որ այս համագործակցության  շրջանակում իսկապես հնարավոր է և մենք կամք ունենք երկրում այնպիսի փոփոխությունների սկիզբ դնել, որ հակառակը՝ մեր քաղաքացիները, մեր հասարակությունը կտեսնեն հույսը, ակնկալիքը, դրական սպասումներ կառաջանան, և վստահ եմ, որ հասարակությունը դա կգնահատի և կբարձրանա նաև քաղաքական ուժերի հեղինակությունը»,- ընդգծեց Աղվան Վարդանյանը: