Ձեր վստահելի աղբյուրը

ՀՀ էներգետիկայի և բնական պաշարների նախարար Երվանդ Զախարյանից լրագրողները հետաքրքվեցին, թե ինչո՞ւ պետք է ՀԷՑ-ի պարտքերը մարելու համար ՀՀ կառավարությունը վարկ վերցնի Համաշխարհային բանկից, նախարարն ասաց, որ պետությունը չի փակում այդ վարկը:

«Դա ընկերություններն են փակում իրենց միջոցների հաշվին: Ո՞վ է ասել, որ պետությունն է տալու այդ վարկը, նման բան ո՞վ  է ասել: Պետությունը թույլ է տալիս, որ ընկերություններն այդ վարկը վերցնեն»,- ասաց նախարարը:

Լրագրողների հարցին, թե այդ պարտքերը կուտակվել են, քանի որ ՀԷՑ-ը ժամանակին չի վճարել ոլորտի ընկերություններին՝ արտադրած էլեկտրաէներգիայի դիմաց, ապա այդ դեպքում ինչո՞ւ նախորդ տարի էլեկտրաէներգիայի սակագինը թանկացավ, նախարարը պատասխանեց. «Ոչ բոլոր պարտքերն են ՀԷՑ-ինը: Մենք թանկ չենք վճարում, այդ վարկերը տրամադրվում են ցածր տոկոսներով և որևէ ազդեցություն, ես արդեն մի քանի անգամ կրկնել եմ, սակագների վրա դա չի ունենա: Բացի այդ, ամբողջ 30 մլն դոլարը վարկը վճարվելու է ընկերությունների կողմից, պետությունը դրա վերաբերյալ որևէ պարտավորություն չունի»:

Դիտարկմանը՝  այդ դեպքում ինչո՞ւ է կառավարությունը վարկ վերցնում, Երվանդ Զախարյանն ասաց, որ բացի դրանից, կան նաև ընկերությունների չվճարված պարտավորություններ, սակայն չնշեց, թե դրանք որ ընկերություններն են:

«Տարբեր ընկերություններ չեն վճարել, չեմ կարող նշել բոլոր ընկերությունների անունները: Ավելի մանրամասն պարզաբանումների համար կարող եք գալ նախարարություն»,- ասաց Երվանդ Զախարյանը: