Ձեր վստահելի աղբյուրը

Հայաստանը դեմ չէ, որ իրանական գազի` դեպի Վրաստան տարանցման համար օգտագործվի Հայաստան-Իրան գազամուղը: Այսօր Երևանում կայացած «Անդրկովկասի Եվրասիական ուղին. Ինտեգրացիա հանուն զարգացման» թեմայով կլոր սեղան-քննարկման ժամանակ նշեց ՀՀ էներգետիկայի և բնական պաշարների փոխնախարար Արեգ Գալստյանը:

Փոխնախարարն ասաց, որ Խորհրդային միության տարիներին Հայաստանը էներգետիկ տեսանկյունից Անդրկովկասում ամենազարգացած երկիրն էր և արտահանում էր իր էներգետիկ արտադրանքի մոտ 30%-ը:

Ըստ Գալստյանի` չնայած նրան, որ ԽՍՀՄ փլուզումից հետո այդ ամենը գործնականում վերացավ, Հայաստանը կարողացավ պահպանել իր էներգետիկ համակարգը: Ա. Գալստյանը նշեց, որ շրջափակման և քաղաքական իրավիճակից ելնելով` Հայաստանը դուրս է տարածաշրջանային մի շարք նախագծերից, չնայած նրան, որ պաշտոնական Երևանը բազմիցս բարձրաձայնել է իր մասնակցության նպատակահարմարությունը:

Փոխնախարարը նաև նշեց, որ Հայաստանը բացառիկ էներգետիկ համագործակցության հարաբերություններ ունի հարևան Իրանի հետ: Մասնավորապես` տևական ժամանակ արդեն գործում է էլեկտրաէներգիայի սեզոնային փոխանակման ծրագիր, այս ընթացքում կառուցվել է Հայաստան-Իրան գազամուղը, և, վերջապես, ստորագրվել է էլեկտրաէներգիայի մատակարարման դիմաց գազի մատակարարման հայ-իրանական համաձայնագիրը:

Փոխնախարարը հատուկ շեշտեց այն իրողությունը, որ անցյալ տարվա սեպտեմբերի 23-ին Հայաստանում ստորագրվեց Իրան-Հայաստան-Վրաստան-Ռուսաստան էներգետիկ համագործակցության համաձայնագիրը, որի շրջանակներում հնարավոր կդառնա Հյուսիս-հարավ միջազգային նախագծի վերջնական իրագործումը:

Ըստ Ա. Գալստյանի` Հայաստանը մասնակցում է նաև Սևծովյան էներգետիկ շղթայի ստեղծման գործընթացին: Ինչ վերաբերում է ածխաջրածնային նախագծերի հեռանկարին, ապա ըստ փոխնախարարի` դրանց մասին դեռևս վաղ է խոսել: Այդուամենայնիվ, փոխնախարարը հայտարարել է, որ Հայաստանը դեմ չէ, որպեսզի իրանական գազի` դեպի Վրաստան տարանցման համար օգտագործվի Հայաստան-Իրան գազամուղը:

Ինչ վերաբերում է Մեղրիի ՀԷԿ-ի կառուցման ծրագրին, ապա Հայաստանը և Իրանը համաձայնության են եկել Արաքսում ջրի մակարդակի նվազման պատճառով վերանայել այն:

Իր հերթին կլոր սեղանին ներկա ռուսաստանյան «Նորագույն պետությունների ինստիտուտի» տնօրեն Ալեքսեյ Մարտինովը, անդրադառնալով ԵՏՄ-ին Հայաստանի անդամակցությանը, մասնավորապես` շրջանառվող այն հարցին, թե ինչ տվեց Երևանին այդ անդամակցությունը, նշեց, որ հարցը պետք է դիտարկել ոչ թե ստացած առավելությունների կտրվածքով, այլ այն առումով, որ միջազգային տնտեսական ճգնաժամի պայմաններում Հայաստանի կորուստները հնարավորինս չնչին էին: Դրանում ըստ փորձագետի` ԵՏՄ-ին Հայաստանի անդամակցությունը շատ որոշակի դեր ուներ:

Անդրադառնալով հարևան Ադրբեջանում առկա տնտեսական վիճակին` փորձագետը նշեց, որ ադրբեջանական տնտեսությունը գործնականում փլուզվել է, և եթե այն ինչ-որ առումով պահպանում է իր գոյությունը, ապա դրա հիմնական պատճառը ոչ թե Ադրբեջանի նշանավոր տնտեսագետներն են, այլ տարիների ընթացքում «կուտակված ճարպերը»: