Ձեր վստահելի աղբյուրը

Գյումրիի մասնավոր կենդանաբանական այգում անմխիթար վիճակում գտնվող կենդանիների խնդիրները լուծված են: Լրագրողների հետ հանդիպման ժամանակ ասաց բնապահպանության նախարարի տեղակալ Խաչիկ Հակոբյանը:

«Գյումրիում ունեինք խնդիրներ, մասնավորապես երկու արջ, երեք առյուծ անմխիթար պայմաններում էին՝ սննման ընթացակարգերի, պահպանման պայմանների խնդիրներ կային, որոնք պայմանավորված էին սեփականատիրոջ ֆինանսական վիճակի  վատթարացման հետ: Այսօր խնդիրը լիարժեք կարգավորում է ստացել շնորհիվ մեր «Վայրի բնության և մշակութային արժեքների պահպանման հիմնադրամ»-ի, Կենդանաբույժների համաշխարհային ծառայության գործընկերների, տեղական հասարակական կազմակերպությունների հետ համատեղ աշխատանքի արդյունքում»,- ասաց նա:

Փոխնախարարի տեղեկացմամբ, հունվարի վերջին արջերը տեղափոխվել են Երևանի կենդանաբանական այգի, որտեղ ստացել են համապատասխան առաջին բժշկական օգնություն, պատվաստվել են, այժմ վերականգնողական փուլում են գտնվում: Առյուծները մոտ տասը օր առաջ տեղափոխվել են Խոսրովի արգելոցի հարևանությամբ գտնվող կովկասյան ապաստարան, որտեղ իրականացվել է առաջին բժշկական օգնություն, պատվաստումներ:

«Վայրի բնության և մշակութային արժեքների պահպանման հիմնադրամ»-ի հիմնադիր Ռուբեն Խաչատրյանը տեղեկացրեց, որ արջերը մեկ ամսվա ընթացքում կտեղափոխվեն Ռումինիայի արջերի ապաստարան, առյուծները՝  Մեծ Բրիտանիայի «Peak Wildlife Park» կենդանաբանական այգի:

«Առյուծների տեղափոխման հետ կապված հստակ ժամկետներ չենք կարող նշել: Կախված է կենդանիների առողջական վիճակից: Առյուծներից մեկն ունի շնչառական խնդիրներ: Մասնագիտացված կառույցից  անասնաբույժ ենք հիրավիրել: Հույս ունենք առաջիկա չորս ամիսներին կկարողանանք առյուծներին նույնպես տեղափոխել»,- ասաց նա:

Ռուբեն Խաչատրյանի խոսքով, առյուծների տեղափոխման ծախսերը հոգալու է Կենդանաբույժների համաշխարհային ծառայությունը, որը ֆինանսավորել է նաև կովկասյան ապաստարանում կարանտին կենտրոնի ստեղծմանը, որտեղ պահվելու են նմանատիպ կենդանիներ, որոնք մասնագետների կողմից բուժման կարիք ունեն: 

Կենդանաբույժների համաշխարհային ծառայության ներկայացուցիչ  Ջեյմս Հոլդենի խոսքով,  տեղեկանալով Գյումրիում կենդանիների հետ կապված խնդրի մասին, անմիջապես արձագանքել են: