Ձեր վստահելի աղբյուրը

Յուրաքանչյուր զինծառայող և քաղաքացիական հատուկ ծառայող պետք է պատրաստ լինի կարճ ժամանակահատվածում առաջադրվող խնդիրների կատարմանը և ունակ լինի դրսևորելու համակարգված մոտեցում, մասնագիտական բարձր պատրաստվածություն: Այս մասին նշել է ՀՀ պաշտպանության նախարար Սեյրան Օհանյանը՝ Զինված ուժերում ձմեռային ուսումնական փուլի մեկնարկի շրջանակում այսօր վաղ առավոտյան, ՀՀ ՊՆ վարչական համալիրում հայտարարված ուսումնական տագնապի ժամանակ ողջունելով ՊՆ կենտրոնական ապարատի անձնակազմին:

ՊՆ մամուլի ծառայության հաղորդմամբ՝ ստանալով համապատասխան ազդանշանը` ՀՀ ՊՆ, ԶՈՒ, ԶՈՒ ԳՇ վարչությունների և առանձին բաժինների զինծառայողներն ու քաղաքացիական հատուկ ծառայողները սահմանված ժամանակահատվածում և համապատասխան հանդերձանքով ներկայացել են ծառայության վայր:

Հանկարծակի ստուգման նպատակն է եղել ստուգել զինծառայողների և քաղաքացիական հատուկ ծառայողների մարտական և զորահավաքային պատրաստականության աստիճանը, նրանց ֆունկցիոնալ պարտականությունների և մասնագիտական գիտելիքների իմացության, դրանք ըստ անհրաժեշտության կիրառելու աստիճանը:

ՀՀ պաշտպանության նախարար Սեյրան Օհանյանը ընդգծել է զինված ուժերում պլանային և արտապլանային միջոցառումների, մարտավարաշարային պարապմունքների անցկացման և անձնակազմի զգոնության աստիճանը մշտապես բարձր պահելու կարևորությունը:

Այս առումով պաշտպանական գերատեսչության ղեկավարը պաշտպանության նախարարության և ԶՈՒ գլխավոր շտաբի կենտրոնական ապարատի անձնակազմին տվել է որոշակի ցուցումներ և հանձնարարականներ: