Ձեր վստահելի աղբյուրը

«Թալիշներն ու հայերը պետք է հավասարապես հետաքրքրված լինեն Ադրբեջան անունով չարիքից ազատվելու հարցում»,-«Ադրբեջանական Հանրապետության բնիկ ժողովուրդները. իրականություն և հեռանկարներ» թեմայով կլոր սեղանի ժամանակ  ասաց Թալիշական շարժման առաջնորդ Ֆահրադին Աբոսզոդան, ով միացել էլ կլոր սեղանին տեսակապի միջոցով:

Ըստ նրա, այս նպատակին հասնելու համար պետք է համատեղել ուժերը, միասնական պլատֆորմով հանդես գալ:

«Բայց ես դեռ դա չեմ տեսնում: Մինչև հիմա Հայաստանը պետական մակարդակով չի հայտարարել, թե ինչ է մտածում այս հարցի մասին»,- ասաց նա:

Ֆ. Աբոսզոդայի խոսքով, Ադրբեջանում շատ են բնիկ ժողովուրդները, բայց  նրանց մի մասը  չի ցանկանում պայքարել իր գոյության համար:

«Մի քանի տարի առաջ Ադրբեջանում  թալիշները,  լեզգիները, ավարներն աշխատում էին այդ ուղղութամբ: Սակայն այսօր ավարները  հրաժարվել ենք այդ պայքարից՝ պատճառաբանելով, որ Դաղստանում ունեն իրենց պետությունը և զբաղվելու են այդ պետության ուժեղացմամբ: Լեզգիական որոշ կազմակերպություններ նույնպես դադարել են պայքարել»,- նշեց նա՝ հավելելով, որ թալիշների հարցն այսօր այլ հնչեղություն է ստանում:

Ըստ նրա, թալիշների համար  ընդունելի տարբերակն է հասնել անկախության:

«Այս  նպատակն է մեր առջև դրված:  Իհարկե, շատ թալիշներ կան, որոնք չեն ընդունում  այս տարբերակը: Բայց հիմնական մասը, մտավորականները կողմնակից են այս գաղափարին և պայքար են տանում այդ ուղղությամբ: Մեր նպատակն է, որպեսզի  մեր տարածաշրջանի քարտեզի վրա չլինի Ադրբեջան պետությունը և, կարծում եմ, մոտ ապագայում հենց այդպես էլ կլինի»,- ասաց Թալիշական շարժման առաջնորդը:  

Ըստ նրա, Ադրբեջանը պետք է երեք մասի բաժանվի:

Նշենք, որ կլոր սեղանը կազմակերպել է Կովկաս-Կասպյան տարածաշրջանի բնիկ ժողովուրդների ինստիտուտը և Մոդուս վիվենդի կենտրոնը: