Ո՞ւր է Ընտրական նոր օրենսգիրքը. Լևոն Բարսեղյան

Քաղաքական 18:31 29/02/2016

Ո՞ւր է Ընտրական նոր օրենսգիրքը. Լևոն Բարսեղյան

«Ո՞ւր է, մարտի 1-ը Ընտրական նոր օրենսգիրքը ներկայացնելու վերջին օրն է ըստ ժամանակացույցի, բայց այն չկա», -այսօր Ընտրական նոր օրենսգրքի վերաբերյալ հանրային քննարկման ժամանակ նման հարցադրում արեց Գյումրու ավագանու անդամ, Գյումրիի «Ասպարեզ» ակումբի նախագահ Լևոն Բարսեղյանը: Նա նկատեց, որ անգամ իշխանական խմբակցության անդամ պատգամավորները չգիտեն՝ ուր է և ինչ օրենսգիրք է սպասվում:

Նկատենք, որ Ընտրական նոր օրենսգիրքը Ազգային ժողով ներկայացնելու է Հայաստանի կառավարությունը:

Այդուհանդերձ, անդրադառնալով Ընտրական նոր օրենսգրքում իր և քաղաքացիական հասարակության ներկայացուցիչների ներկայացրած առաջարկություններին, ասաց, որ ընտրացուցակների հրապարակումը կդադարեցնի իշխանությունների վերարտադրությունը:

«Այնպես արեք, որ ընտրացուցակները մեզ համար մատչելի լինեն, ոչ թե հրապարակեք, այլ մատչելի լինեն, ինչպես կանեք, դա ձեր գործն է, բայց թող մատչելի լինեն», -դիմելով իշխանությունների տարբեր ներկայացուցիչներին, հայտարարեց Բարսեղյանը:

Նրա պնդմամբ, ընտրությւոնների մասնակիցների անուն ազգանունները հրապարակելը բավարար է ընտրական գործընթացի նկատմամբ վերահսկողության համար:

«Մասնակցությունը գաղտնի չէ, գաղտնի է քվեարկությունը: Մենք մասնակցածների անուն-ազգանունները կնույնականացնենք այն ցուցակների հետ, որոնք հրապարակվել են մինչև ընտրությունները և կգնանք հանգուցյալների տներով, որ հասկանանք՝ ինչու են մասնակցում ընտրությանը և տուն չեն մտնում: Եթե սա մերժում են, ապա ես այս ռեժիմի հետ խոսելու բան չունեմ», -հավելեց Լևոն Բարսեղյանը:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: