Ձեր վստահելի աղբյուրը

Երևանում այսօր տեղի ունեցավ «Հանրային առողջության նոր մարտահրավերներ»  խորագրով միջազգային նախարարական համաժողովը, որի նպատակն է վերլուծել հանրային առողջության խնդիրները և մշակել դրանց լուծման համընդհանուր մոտեցումները:

Համաժողովին մասնակցում էին Ռուսաստանի Դաշնության առողջապահության նախարար Վերոնիկա Սկվորցովայի,  Իրանի Իսլամական Հանրապետության առողջապահության և բժշկական կրթության նախարար Հասան Հաշեմի, Վրաստանի աշխատանքի, առողջապահության և սոցիալական հարցերի նախարար Դավիդ Սերգեենկոյի, Բելառուսի առողջապահության նախարար Վասիլի Ժարկոյի, Ղազախստանի առողջապահության և սոցիալական զարգացման նախարարի տեղակալ  Ելժան Բիրտանովի գլխավորած պատվիրակությունները: Բացի այդ, Հայաստան է ժամանել Առողջապահության համաշխարհային կազմակերպության Եվրոպական գրասենյակի քաղաքականության վարչության պետ Պիրոժկա Օստլինը:

Ռուսաստանի Դաշնության առողջապահության նախարար Վերոնիկա Սկվորցովան լրագրողների հետ զրույցում ներկայացնելով  Ռուսաստանում հանրության առողջության պահպանման ոլորտում  իրականացվող ծրագրերը՝  նշեց, որ ծրագրերը կարելի է երեք խմբի բաժանել:
Դրանցից առաջինը վերաբերում է առողջ ապրելակերպին, ծխելու և ալկոհոլի  դեմ պայքարին, ինչպես նաև իրականացվում են աղի, շաքարի և մարդու առողջության համար վնասակար որոշ այլ մթերքների  օգտագործման սահմանափակմանն ուղղված միջոցառումներ:

Ծրագրերի երկրորդ խումբը սկրինինգներն են:  Վերոնիկա Սկվորցովան  նշեց, որ 2013 թվականից Ռուսաստանում ներդրվել են մասշտաբային սկրինինգներ, որոնք  անվճար են հանրության համար։ «Երեխաները կարող ն անվճար հետազոտվել տարին մեկ անգամ, իսկ տարեցները` 3 տարին մեկ։ Այդ ծրագրերը մեզ հնարավորություն տվեցին ախտորոշել օնկոլոգիական հիվանդությունները, մասնավորապես  72 տոկոսում ի հայտ բերել ուռուցքային հիվանդություններ վաղ  փուլերում,  ինչպես նաև վերհանել սիրտ-անոթային հիվանդությունների ռիսկի գործոնները, վերահսկել դրանք և անվճար դիսպանսեր վերահսկողություն տրամադրել»,- ասաց ՌԴ առողջապահության նախարարը:

Ծրագրերի երրորդ խումբն արդյունավետ բժշկական օգնություն տրամադրելու հնարավորությունն է այն դեպքում, երբ մարդն ուղեղի, սրտի կաթված է տարել կամ այլ խնդիր ունի: Այդ նպատակով Ռուսաստանում եռաստիճան համակարգ է ստեղծվել, որը դրական արդյունքներ է տվել և շարունակում է զարգանալ:

Բելառուսի առողջապահության նախարար Վասիլի Ժարկոն էլ նշեց, որ Բելառուսում ժողովրդագրական անվտանգության պետական ծրագիր է իրականացվում, որը ներառում է տուբերկուլյոզի, ՄԻԱՎ-ի, խմելու և հարբեցողության դեմ պայքարի ծրագրեր: Իրականացվում են նաև ծրագրեր սրտաբանության ոլորտում:  «Հանրային առողջապահության ոլորտում իրականացվող ծրագրերն օգնում են ապահովել բնակչության բնական աճը»,- ասաց նախարարը:

Ըստ նրա՝ վերջին 3 տարիների ընթացքում Բելառուսում մայրական մահացության որևէ դեպք չի գրանցվել։ «Մենք հպարտանում ենք դրանով ու մեր հիմնական նպատակն է` պահպանել արդյունքները»,- ընդգծեց նա՝  հավելելով, որ այս տարի Բելառուսում նաև գրիպի համաճարակ չի գրանցվել. «Մենք հանգիստ ապրեցինք։ Բնակչության մեծ մասը՝ 95-97 տոկոսը պատվաստվել էր»: