Ձեր վստահելի աղբյուրը

Դանակի երեսուն հարվածով կնոջը՝ 38-ամյա Հեղինե Դարբազյանին սպանելու համար մեղադրվող Արտակ Առաքելյանի գործով դատավարությունը Երևանի Մալաթիա-Սեբաստիա վարչական շրջանի ընդհանուր իրավասության դատարանում դեռ չի մտել դատաքննության փուլ. հունվարի վերջից մեկնարկած դատական նիստերը արդեն մի քանի անգամ հետաձգվել են: Հաջորդ նիստը նշանակված է մարտի 2-ին:

Արտակ Առաքելյանին մեղադրանքն առաջադրվել է այն բանի համար, որ «խանդի շարժառիթով» և «ամուսնական անհավատարմության պատճառով սպանելու դիտավորությամբ» 2015-ի սեպտեմբերի 27-ին գնացել է Մալաթիա շուկային կից վարագույրների խանութ, որտեղ աշխատել է նախկին կինը, և իր մոտ եղած որսորդական դանակով բազմաթիվ՝ 30 հարված է հասցրել իր նախկին կնոջ՝ Հեղինե Դարբազյանի մարմնի տարբեր մասերին, ինչի հետևանքով Հեղինեն մահացել է: Արտակ Առաքելյանին մեղադրանք է առաջադրվել քրեական օրենսգրքի 104-րդ հոդվածի 1-ին մասով (սպանություն), 235-րդ հոդվածի 4-րդ մասով (ապօրինի կերպով զենք կրել): Նրան սպառնում է մինչև 15 տարի ազատազրկում:

Հեղինեի իրավահաջորդ քրոջ՝ Քրիստինե Դարբազյանի ներկայացուցիչ, փաստաբան Սեդա Սաֆարյանը Panorama.am-ի թղթակցի հետ զրույցում ասաց, որ նախաքննության առաջադրած վարկածի հետ տուժող կողմը համաձայն չէ:

«Սահմանափակ քննություն է տարվել շարժառիթի հետ կապված: Անհավատարմության մասին խոսք լինել չէր կարող, այդ ուղղությամբ բացարձակապես քննություն չի տարվել: Մեղադրանքի հիմքում դրված փաստական հանգամանքը բացարձակ մեղադրյալի ենթադրությունն է: Բազմաթիվ մարդիկ կային, որոնք կարող էին քննությանը լուրջ վկայություններ ներկայացնել: Բայց քանի որ քննությունը այդ ուղղությամբ խորացած չի եղել, և դրա համար էլ քննիչին չի հետաքրքրել այլ անձանց հարցաքննելը: Արդյունքում կազմվել է ենթադրությունների հիման վրա կազմված մեղադրական եզրակացություն», -հավելեց փաստաբանը:

Ըստ տիկին Սաֆարյանի, քննիչին բավարարել է միայն այն հանգամանքը, որ Առաքելյանը կատարել է սպանություն, կազմվել է մեղադրանքը ու այդպես ուղարկվել դատարանը:

«Կարծում եմ որ սպանության շարժառիթում առանձին դաժանության երանգ կա: Առաքելյանը մտադրված է եղել սպանել, բացի այդ երեխաներին հայտարարել է, որ սպանելու է կնոջը և հետո իրեն: Այդ կարգի հայտարարություններ է արել: Երեխաները այդ առումով պատրաստ են եղել, իրենց հոր գործողությունները իրենց համար կանխատեսելի են եղել», -ներկայացրեց Սաֆարյանը:

Ըստ որոշ տեղեկությունների, ամուսինը խանդել է կնոջը՝ ազգությամբ թուրք մի մարդու հետ շփվելու համար: Սակայն փաստաբան Սաֆարյանը հերքում է այդ վարկածը՝ նկատելով, որ ազգությամբ թուրք անձնավորության հետ նրանք երկուսն էլ՝ և Հեղինեն, և Արտակը, ունեցել են գործնական հարաբերություններ:

«Նրանց հետ կապը եղել է գործնական նպատակներով: Նրանք միասին են գնացել, այդ մարդու հետ առևտուր արել, պարտքեր կուտակել: Հիմա էս տղան խուսափում է ի հայտ բերել պարտքի թեման և պատճառաբանում է, թե այդ թուրքը զանգել է կնոջը: Լրիվ այլ մոտիվացիա: Բայց նման մոտիվացիա չի եղել, և կարծում եմ, որ գործով քննության ընթացքում դուք կհամոզվեք, որ այդ մոտիվացիան հորինված է», -նշեց փաստաբանը:

Ամուսինները անհաշտ են ապրել, և ամուսնուց բաժանվելուց հետո էլ Առաքելյանը կնոջը հանգիստ չի թողել այն աստիճան, որ կինը դիմել է ոստիկանություն՝ բողոքելով իրեն պարբերաբար հետապնդող ու սպառնացող ամուսնու գործողություններից: Ոստիկանությունում Արտակ Առաքելյանին ընդամենը հորդորել են հեռու մնալ կնոջից:

Փաստաբանի խոսքով, իմանալով այս զույգի վատ հարաբերությունների մասին, «այդքանից հետո չեն կարողացել գալիքը տեսնել»:

«Ես կարծում եմ, որ դեռ այն ժամանակ ռեալ, իրական վտանգ է եղել մեր Հեղինեի կյանքի նկատմամբ: Ես կարծում եմ, որ դատաքննության ընթացքում նախաքննության ներկայացրած փաստական հանգամանքներին ի հակառակ ցուցմունքներ կլինեն: Իսկ թե մեղադրանքը վերաորակելու հարցում ինչպիսին կլինի դատարանի մոտեցումը, դա թողնենք դատարանին, բայց կարծում եմ մեր գործն է, որ օգնենք դատարանին ճիշտ պատկերացում կազմի այս սպանության շարժառիթների հետ կապված», -հավելեց փաստաբանը՝ ընդգծելով, ինքը շահագրգիռ է, գործով ճշմարտությունը ի հայտ գա, քանի որ չի ցանկանում, որ անձի կյանքը կործանվի և ավելին, դատական ակտերում նրա վերաբերյալ վարկաբեկող տվյալներ լինեն: