Ձեր վստահելի աղբյուրը

Այսօր Էրեբունի և Նուբարաշեն վարչական շրջանների ընդհանուր իրավասության դատարանում վթարից տուժած Հակոբյանների ու Վարդան Պետրոսյանի միջև այսօր հաշտության համաձայնագիր է կնքվել: Այդ մասին Panorama.am-ին տեղեկացրեց Պետրոսյանի փաստաբան Նիկոլայ Բաղդասարյանը:

«Համաձայնագրի էությունն այն է, որ Վարդան Պետրոսյանը որպես դատական ծախս տուժող Հակոբյաններին վճարելու է 2 մլն դրամ: Սա ճիշտ մոտեցում է. ավելի լավ է այդ գումարը վճարել, քան այդքան դատական վեճերի մեջ լինել», -փոխանցեց Բաղդասարյանը՝ նկատելով, որ Վարդան Պետրոսյանը համաձայնել է այդ քայլին գնալ դատական քաշքշուկից ազատվելու պայմանով:

Ընդհանուր առմամբ, մեկնաբանելով 2013-ի հոկտեմբերի 21-ին տեղի ունեցած ավտովթարի ու դրանից հետո կատարված իրավական գործընթացները, Բաղդասարյանը նկատեց, որ դրանք բացասական ազդեցություն են ունեցել  Հայաստանի արդարադատության վրա:

«Այս գործընթդացը ցույց տվեց, որ փաստաբանական համերաշխություն չի կարող լինել, ցավոք, ականատես եղանք, թե ինչպես պետական մարմինները խառնվեցին նախաքննական ու դատական գործընթացների մեջ և առավել ակնհայտ դարձավ, որ ժողովրդի շրջանում խորը անվստահություն կա դատական համակարգի նկատմամբ: Իսկ եթե դատական համակարգին չեն վստահում, ինքը պարզապես գոյություն ունեալ չի կարող», -հավելեց փաստաբան Բաղդասարյանը:

Ինչ վերաբերում է ֆինանսական համաձայնագրից դուրս Հակոբյանների ու Պետրոսյանի միջև մարդկային հաշտեցմանը, ապա Բաղդասարյանի խոսքով, այդ մասին խոսելը դեռ վաղ է: