Ձեր վստահելի աղբյուրը

«Ռոսիա» կինոթատրոնի տեսքը կպահպանվի, սակայն ավելի կմոդեռնիզացվի: Այս մասին այսօր լրագրողների հետ զրույցում ասաց «Ռոսիո Մոլ» առևտրի և ժամանցի կենտրոնի հիմնադիր, «Սիլ գրուպի» նախագահ Խաչատուր Սուքիասյանը:

««Ռոսիա» կինոթատրոնը 45 տարվա պատմություն ունի և հիմա աշխարհում կան նոր նյութեր, նոր գործիքներ, որոնցով հնարավոր է այսօրվա պահանջներին համապատասխան կառույց ստանալ: Ուստի մենք այդ ուղղությամբ  ենք մտածում, բայց անկախ ամեն ինչից, ես կթողնեմ այն տեսքը, որը կա: Ուղղակի առավել կմոդեռնիզացնենք, կդարձնենք այնպիսին, որ այս ժամանակին համարժեք լինի»,- նշեց Խաչատուր Սուքիասյանը՝ հավելելով, որ իրենք  «Ռոսիա» կինոթատրոնը դիտում են հետևյալ կերպ. «Եթե այն մեզ համապատասխան օգուտներ, գումարներ չտա, այս մնացած կառույցներից այդ գումարները կուղղենք, որպեսզի այդ շենքը պահենք»:

Նրա խոքերով՝ ճարտարապետները պետք է գնան ռիսկերի՝ նորարության առումով և հավակնոտ ծրագրեր պետք է ներկայացնեն:

«Սակայն ես նման ծրագրեր չեմ տեսնում, ճարտարապետական և կոնստրուկտորական ոլորտում խնդիր եմ տեսնում, սակայն շատ կուզեի, որ ինչպես Hi-Tech-ի բնագավառում ունենք բավականին զարգացած կառույցներ, որոնք աշխարհի ցանկացած երկրների համար ծրագրեր են կազմում և վաճառում, շատ լավ կլիներ, որ ճարտարապետությունը նույն դիրքերում լիներ: Բայց ցավոք, այդ առումով սպասումները դեռ չեն արդարանում, միգուցե մոտ ապագայում լինի»,- նշեց Խ.Սուքիասյանը:

Հարցին, թե երբ են պատրաստվում գործարկել «Ռոսիա» կինոթատրոնը, ասաց, որ աշխատանքներն արդեն սկսել են, այդտեղ բավականին ամրապնդման խնդիրներ ունեն մետրոյի հետ կապված, որպեսզի հետագայում խնդիրներ չառաջանան: 

Դիտարկմանը, թե Խաչատուր Սուքիասյանը կառուցապատման ժամանակ կարողացել է պահպանել Երևանի հին շինությունների մի մասը և արդյոք կշարունակի այդ քայլերը, նշեց, որ պատրաստ է ցանկացած գեղեցիկ շենք և կառուցել, և պահպանել, և վերակառուցել. «Բայց այդտեղ պետք է լինի այն միտքը՝ այդ կառույցն ինչի՞ն պետք է ծառայի»:

Հարցին, թե արդյոք հնարավոր չէր փրկել, օրինակ, Արամի 30-ը, որը գտնվում է նրան պատկանող շինությունների դիմաց , գործարարը պատասխանեց.  «Ես չգիտեմ՝ Արամի 30-ը ո՞ր թվականին է կառուցվել, բայց դրանից առաջ ավելի գեղեցիկ շենքեր օտարվեցին: Ես ուղղակի չեմ կարողանում հասկանալ՝ այդ գեղեցիկ շենքերի օտարման արդյունքում ինչո՞ւ ոչ մի աղմուկ չեղավ: Արամի 30-ը ես չէի համեմատի մնացած պատմամշակութային շենքերի հետ»:

Անդրադառնալով Աֆրիկյանների շենքին, Խաչատուր Սուքիասյանը պատասխանեց. «Աֆրիկյանների շենքը ֆանտաստիկ շենք է, եթե դա վերականգնեն, ես շնորհակալություն կհայտնեմ»:

Panorama.am - «Աղմուկի» մասով՝ կարդացեք խնդրեմ ստորև ներկայացված հրապարակումները, որ թեմային առնչվողների փոքր մասն է միայն։