Ձեր վստահելի աղբյուրը

«Հայկական ժամանակ»-ը հրապարակել է արկղով լոլիկի արկղի լուսանկար ու գրել. «Վերը բերված լուսանկարը արվել է երեկ՝ «Երևան սիթի»  սուպերմարկետներից մեկում:  Ինչպես պարզ երևում է  տուփի վրայի գրառումից, սա թուրքական արտադրության լոլիկ  է, արտադրված է,  մի ընկերությունում, որի գրասենյակը գտնվում է,  Անթալիա քաղաքում:  Կան նույնիսկ այդ ընկերության  հեռախոսահամարները և հասցեն: 

Իհարկե,  կարելի է «պարզաբանել», որ սա ամենևին էլ թուրքական արտադրության չէ, այլ ընդամենը վաճառքի ժամանակ օգտագործվում են թուրքական լոլիկի տուփերը, իսկ դրանք ներկրված են եղել ասենք, մի 40 տարի առաջ:  Բայց այս  «պարզաբանումը», մեղմ ասած, այնքան էլ համոզիչ չի հնչի, եթե հաշվի առնենք, որ տվյալ լոլիկը վաճառվում է  մեկ կգ-ը  850 դրամով,  իսկ քիչ հեռու դրված է հայկական «Բիո գրուպ» ընկերության արտադրված  լոլիկը,  որի մեկ կիլոգրամը  վաճառվում է  1450 դրամով: 

Այսինքն, սա էլ է ապացուցում, որ թուրքական տուփերի մեջ  գտնվող այս լոլիկը  հենց թուրքական է , և դրա ցածր գինը պայմանավորված է այն հանգամանքով, որ Թուրքիայի դեմ ՌԴ –ի կողմից  կիրառվող  պատժամիջոցների  արդյունքում  թուրք արտադրողների  արտադրանքը  դժվարությամբ է իրացվում, և նրանք ստիպված իջեցնում են գները նոր շուկաներ մուտք գործելու նպատակով»:
Մանրամասները՝ թերթի այսօրվա համարում: