Ձեր վստահելի աղբյուրը

Չայկովսկու անվան մրցույթի ոսկե մեդալակիր թավջութակահար Նարեկ Հախնազարյանը ծնողների` դաշնակահարուհի Գայանե և ջութակահար Սուրեն Հախնազարյանների հետ մարտի 12-ին համերգով հանդես է գալու Մոսկվայի Չայկովսկու անվան պետական կոնսերվատորիայում: Այս մասին տեղեկանում ենք կոնսերվատորիայի պաշտոնական կայքից:

Նարեկն իր ֆեյսբուքյան էջում գրել է, որ  հանդես գալով աշխարհի լավագույն համերգասրահներում, սիրով և պատասխանատվությամբ է համերգներ ունենում  հատկապես Մոսկվայի Չայկովսկու անվան պետական կոնսերվատորիայում:

«Ինձ համար կրկնակի երջանկություն է, որ այս անգամ բեմը կիսելու եմ իմ կյանքում երկու կարևոր մարդու և երաժիշտների հետ՝ իմ ծնողների՝ Գայանե և Սուրեն Հախնազարյանների»,- գրել է Նարեկ Հախնազարյանը:

Համերգին հնչելու է դասականից մինչև ժամանակակից կոմպոզիտորների՝  Շումանի, Բեթհովենի, Շոպենի, Ռախմանինովի, Ֆորեի և Լիգետիի գործերը:

Թավջութակահար Նարեկ Հախնազարյանը ծնվել է 1988 թվականին Երևանում: Սովորել է Երևանի Սայաթ-Նովայի անվան երաժշտական դպրոցում` Զարեհ Սարգսյանի դասարանում, ապա Մոսկվայի կոնսերվատորիայում: Շրջագայություններով հանդես է եկել աշխարհի տարբեր պետություններում, այդ թվում՝ ԱՄՆ, Գերմանիա, Մեծ Բրիտանիա, Ֆրանսիա և այլուր։ Ելույթ է ունեցել Մարիինյան թատրոնի, Չիկագոյի, Տոկիոյի և Լոնդոնի սիմֆոնիկ, «Նոր Ռուսաստան», ռուսական ազգային, Ռոտերդամի ֆիլհարմոնիկ, Վերդիի անվան և այլ աշխարհահռչակ նվագախմբերի հետ, Վ.Սպիվակովի, Ջ.Մեսթերի, Հ.Վոլֆի, Վ.Գյորգիևի, Մ.Յուրովսկու և այլ հանրաճանաչ դիրիժորների ղեկավարությամբ: Մասնակցել է բազմաթիվ միջազգային մրցույթների և ամենուր արժանացել բարձր գնահատանքի, պատվոգրերի, մրցանակների: 2008թ. Նյու Յորքի «Young Concert Artists» մրցույթում արժանացել է 9 Հատուկ մրցանակի, 2006թ. Արամ Խաչատրյանի անվան միջազգային մրցույթում` 1-ին մրցանակ և ոսկե մեդալ, 2007թ. Չայկովսկու անվան մրցույթում` դափնեկրի կոչմանը և մի շարք այլ հեղինակավոր մրցույթներ ու մրցանակներ: 2007թ. արժանացել է ՀՀ նախագահի երիտասարդական մրցանակին: «Վաշինգթոն փոսթ» թերթը նրան անվանել է «ֆենոմենալ թավջութակահար»: ԱՄՆ-ի Փասադենա քաղաքի սիմֆոնիկ նվագախմբի մենակատարն է: 2011թ. դարձել է Չայկովսկու անվան մրցույթի ոսկե մեդալակիր: 2013թ. արժանացել է ՀՀ «Մովսես Խորենացի» պետական մեդալի: