Ձեր վստահելի աղբյուրը

«Ներկայումս կուլիսային աշխատանքների ժամանակշրջան է, չկա հաստակ և բաց բանակցային գործընթաց, բայց կա նախապատրաստական, այսպես ասած, տնային աշխատանքներ կատարելու ժամանակահատված, երբ հակամարտող կողմերից յուրաքանչյուրը, միջնորդներն էլ իրենց հերթին, փորձում են իրավիճակային փոփոխությունների հասնել՝ բանակցային հնարավոր նոր փուլի վերսկսման դեպքում»,-լրագրողների հետ հանդիպմանն այսպես բնորոշեց հայ-ադրբեջանական հակամարտության ներկայիս փուլը քաղաքագետ Հրանտ Մելիք-Շահնազարյանը:

Ինչ վերաբերում է Ռուսաստանին, նա ասաց, որ հիմա Ռուսաստանը փորձում է մի կողմից զենքի առևտրի միջոցով ուժեղացնել իր ազդեցությունը հակամարտող կողմերի վրա և մյուս կողմից էլ տնտեսական հագործակցության տարբեր ձևաչափեր զարգացնելու միջոցով ակտիվացնել իր քաղաքականությունը Հարավային Կովկասում:

«Արդեն իսկ հայտարարվել է, մարտի 10-ին նախագահ Սերժ Սարգսյանի Մոսկվա աշխատանքային այցի ընթացքում քննարկվելու է ղարաբաղյան հակամարտությանը վերաբերող հարցեր: Կարծում եմ, որ Հայաստանի և Ռուսաստանի առաջնահերթությունները այս հարցերում համահունչ են և երկու կողմերն էլ շահագրգռված են տարածաշրջանի խաղաղությամբ»,-նցեց քաղաքագետը:

Անդրադառնալով ԵԱՀԿ Մինսկի խմբի ամերիկացի համանախագահ Ջեյմս Ուորլիքի Թբիլիսի այցին՝ քաղաքագետն ասաց, որ միայն այն մասին տեղեկություն ունի, որ փորձագիտական մակարդակի քննարկումներ են լինելու. «Քննարկման մասնակիցները պայմանավորվել են որևէ բան չհրապարակել դրանից: Կարծում եմ, որ փորձագետներ կլինեն Հայաստանից և Ադրբեջանից, ինչպես նաև հնարավոր է փորձագետներ լինեն միջազգային այլ կառույցներից»:

Խոսելով ԼՂՀ ինքնիշխանության և անկախության ճանաչումից, Հրանտ Մելիք-Շահնազարյանը կարծիք հայտնեց, որ հայ համայնքը, հատկապես Միացյալ նահանգներում, ավելի շատ կենտրոնացած է Ցեղասպանության հարցերի վրա, քան մնացած այլ հարցերի. «Եթե նույն ռեսուրսների 20-30 տոկոսը ծախսվի հայ-ադրբեջանական հակամարտությունը ավելի ճիշտ ներկայացնելու վրա, կարծում եմ լուրջ հաջողություններ կունենանք: Մի քանի օր առաջ արդեն ԱՄՆ-ի վեցերորդ նահանգը ճանաչեց Արցախի անկախությունը, սա հետաքրքիր տենդենց է և այն պետք է զարգացնել: Պետք է ստեղծել Արցախի անկախությունը ճանաչելու հասարակական պահանջ, որը կարող է արտահայտվել թեկուզ նահանգային ճանաչման մակարդակով»: