Ձեր վստահելի աղբյուրը

«Սա իրականում իմիտացիա է իբր թե քննարկման, դուք բերել եք այնպիսի մի Ընտրական օրենսգիրք, որն ավելի վատն է, քան գործող Ընտրական օրենսգիրքը: Դուք բերել եք մի այնպիսի օրենսգիրք, որ մենք պայքարենք զիջված դիրքերի համար, մոռանանք մեր առանցքային պնդումների մասին», -այսօր Ընտրական նոր օրենսգրքի նախագծի վերաբերյալ քննարկման ժամանակ հայտարարեց ԱԺ ՀԱԿ խմբակցության ղեկավար Լևոն Զուրաբյանը:

Նրա պնդմամբ, նման գործելաոճը «խարդախություն է, խորամանկություն է»:

Ընդդիմադիր պատգամավորը Ընտրական նոր օրենսգրքի նախագիծը ներկայացնող հեղինակներից Դավիթ Հարությունյանին առաջարկեց ընտրական գործընթացի նկատմամբ հանրության վստահությունը վերականգնելու համար ստեղծել հանձնաժողով

«Այդ մարմինը կազմված կլինի իշխանության 4 ներկայացուցիչներից, 4 ընդդմադիր խմբակցություններից և քաղաքացիական հասարակության 4 ներկայացուցիչներից: Եկեք ստեղծենք այդ մարմինը, որտեղ կքննարկենք այն հիմնական սկզբունքները, որոնք կհանեն բոլորի մտահոգությունները ընտրական գործընթացի անօրինականության մասին», -դիմելով Հարությունյանին, առաջարկը ներկայացրեց Զուրաբյանը:

Ի պատասխան Դավիթ Հարությունյանն ասաց, որ Ընտրական նոր օրենսգրքի նախագիծը՝ տարբեր օրենքներում կատարվելիք փոփոխություններով, ստեղծելու համար աշխատանքային խումբն ունեցել է 13 օր և դրա համար պահանջվել է «գերլարված աշխատանք»: Պաշտոնյան ասաց, որ ցանկացած առաջարկություն օրինագծի հեղինակների համար ընդունելի է:

Զուրաբյանը հստակեցրեց, թե հնարավոր չէ՞ քննարկման ձևաչափ ստեղծել իր առաջարկած տարբերակով, Հարությունյանն ի պատասխան արձագանքեց, որ «ցանկացած ձևաչափ ընդունելի է»:

«Երկկողմ, բազմակողմ ցանկացած ֆորմատ, որտեղ կլինի բովանդակային քննարկում, ընդունելի է, մենք դրան պատրաստ ենք, միայն թե ներկայացրեք առաջարկություններ: Ուզում եք չորս, ուզում եք 100+4, էական չէ, մեզ համար ընդունելի է», -հայտարարեց Հարությունյանը: