Ձեր վստահելի աղբյուրը

Այսօր Գյումրիի 102-րդ ռազմական բազայի տարածքում շարունակվել է գյումրեցի Ավետիսյանների սպանության մեջ մեղադրվող ռուս զինծառայող Վալերի Պերմյակովի գործով դատական նիստը:

Այսօրվա նիստում դատարանը լսել է միայն մեկ վկայի՝ ռուսական սահմանապահ ջոկատի սահմանապահ Ռոմիկ Խաչատրյանին: Վերջինը դատարանին գործով որևէ նորություն չի հայտնել:

Այս դատական նիստում դատավորը ներկայացրել է 102-րդ ռազմաբազայի հրամանատարության պատասխանը՝ տուժող կողմի ներկայացուցիչների միջնորդությանը:

Նշենք, որ նախորդ դատական նիստի ժամանակ տուժողի իրավահաջորդների ներկայացուցիչները միջնորդություն էին ներկայացրել դատարանին, որպեսզի որպես վկա դատարանում հարցաքննության հրավիրվեն Պերմյակովի 7 ծառայակիցները, որոնց թվում է Անդրեյ Նիկիշինը: Տուժողների ներկայացուցիչների խոսքով, հենց Նիկիշինն է նրան տեղափոխել Հայաստան:

102-րդ ռազմաբազայի հրամանատարությունը դատարանին ուղղված նամակում նշել է, որ 7 ծառայողները ավարտել են իրենց ծառայությունը և նրանց գտնվելու մասին տեղեկություններ չկան:

«Ամենակարևոր վկաներից մեկը ըստ էության, Նիկիշինն է, որը ընտրել է Պերմյակովին ու Հայաստան տեղափոխել: Երբ գործը ռուսական կողմում էր քննվում, մենք լսեցինք Նիկիշինին, որն ասում էր, որ ինքը հատուկ ընտրություն է կատարել և ընտրել է լավագույններին»,- նիստից հետո լրագրողների հետ ճեպազրույցում ասել է Ավետիսյանների իրավահաջորդների ներկայացուցիչ-փաստաբան Լուիսնե Սահակյանը:

Ըստ փաստաբանի, այդ վկաները կարևորագույն վկաներ են և ռուսական կողմը պետք է ապահովի նրանց ներկայությունը դատարանում:

«Այլապես մեզ համար ակնհայտ է, որ նրանք իրականում թաքցնում են, պաշտպանում են այն անձանց, որոնց մեղքով Պերմյակովի մոտ զենք է հայտնվել», -հավելեց Սահակյանը:

Այսօրվա նիստում նաև մեղադրանքը պաշտպանող դատախազի միջնորդությամբ վկայի ցուցմունքներից հետո դատարանն անցել է փաստաթղթերի հրապարակմանը: Մասնավորապես, հրապարակվել են դեպքի վայրի՝ Ավետիսյանների տան լուսանկարները: