Չադրայով ման եկող չկա, հրապարակեք ցուցակները. Արմեն Մարտիրոսյան

15:31 11/03/2016

Չադրայով ման եկող չկա, հրապարակեք ցուցակները. Արմեն Մարտիրոսյան

«Ներկայացնելով նման Ընտրական օրենսգրքի նախագիծ, իշխանությունները մեկ նպատակ են հետապնդել՝ ներկայացնել շատ վատը, որը քննարկման արդյունքում կդառնա ընդամենը վատը», -այսօր Ընտրական նոր օրենսգրքի նախագծի վերաբերյալ քննարկման ժամանակ դիմելով դրան մասնակից իշխանության ներկայացուցիչներին՝ հայտարարեց «Ժառանգություն» կուսակցության փոխնախագահ Արմեն Մարտիրոսյանը:

Անդրադառնալով Ընտրական նոր օրենսգրքի բովանդակությանը, ընդդիմադիր կուսակցության ներկայացուցիչն ասաց, որ նախագծով ոչ թե հրաժարվում են մեծամասնական ընտրակարգից, այլ «մեծամասնականի թվաքանակի մեծացում»:

«Տոկոսները մեծամասնականի ավելացան՝ ներկայիս 25 տոկոսի փոխարեն հիմա դարձավ 51 տոկոս: Ավելին, եթե նախկինում քաղաքացին կարողանում էր մեծամասնական և կուսակցական ցանկերը տարբերել, ապա այս դեպքում այդ ընտրակաշառքը, թաաղի ռեսուրսի օգտագործումը, որ մեծամասնականի համար կիրառվում էր, արդեն պետք է օգտագործվի նաև կուսակցության համար, իշխող կուսակցության համար: Սա միանշանակ անընդունելի է», -հայտարարեց Մարտիրոսյանը՝ ընդգծելով, որ պարզ համամասնական ընտրակարգի կիրառման դեպքում որևէ խնդիր չէր լինի:

Ամփոփելով ելույթը, «Ժառանգության» ներկայացուցիչը ներկայացրեց առաջարկությունները՝ չդակել քվեաթերթիկով ծրարը, վերացնել դիտորդների ու լրագրողների համար դրված սահմանափակումը, հրապարակել ընտրացուցակները:

«Հայաստանում ոչ մեկ չադրայով ման չի գալիս, բոլորի համար ակնհայտ է՝ ովքեր են գնում ընտրությունների, հրապարակեք ընտրացուցակները», -դիմելով իշխանություններին, ասաց Մարտիրոսյանը:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: