Ձեր վստահելի աղբյուրը

«Ընտրացուցակները պաշտոնապես հրապարակելու պահանջի հետ կապված մենք չենք պատրաստվում խախտել միջազգային փաստաթղթերում ընդունված սկզբունքները, չենք պատրաստվում խախտել Սահմանադրական դատարանի դիրքորոշումը», -այսօր լրագրողների հետ ճեպազրույցում հայտարարեց Ընտրական նոր օրենսգրքի հեղինակներից Դավիթ Հարությունյանը՝ պատասխանելով հարցին, թե հնարավո՞ր է բավարարվի ընդդիմության պահանջը և ընտրություններին մասնակցած անձանց ցուցակները հրապարակվեն:

Նրա խոսքով, Սահմանադրական դատարանն այս հարցի հետ կապված երկու անգամ դիրքորոշում հայտնել է՝ նշելով, որ միջազգային կազմակերպությունները դա ընտրություններին մասնակցած անձանց ցուցակների հրապարակումը համարում են գաղտնիություն պարունակող տարր:

«Սահմանադրական դատարանը պաշտպանում է այդ մոտեցումը», -ՍԴ դիրքորոշումը հիշեցրեց Հարությունյանը:

Այդուհանդերձ, Հարությունյանն ասաց, որ իրենք պատրաստ են «որոնել մեխանիզմներ»՝ ընտրական գործընթացների նկատմամբ վերահսկողություն իրականացնելու համար:

«Մենք առաջարկել ենք մեխանիզմ՝ ինչպես կանխարգելել կրկնաքվեարկությունը կամ այլ անձանց փոխարեն քվեարկությունը: Կարծում եմ, որ այս առումով մեխանիզմները կատարելագործելու, ավելի պատշաճ դարձնելու առումով մենք պատրաստ ենք համագործակցության: Արհեստական, այսինքն, պահանջ հանուն պահանջի ներկայացնել պետք չէ», -հայտարարեց Հարությունյանը:

Նա ընդգծեց, որ ցանկացած անձ՝ դիտորդ, վստահված անձ ունի հնարավորություն ծանոթանալ այդ ցուցակին, պատկերացում կազմել դրանց մասին, արձանագրել ու դրա հիման վրա բողոք ներկայացնել դատական ատյաններին:

«Այս մեխանիզմները եթե հնարավոր է ավելի կատարելագործել, ապա մենք պատրաստ ենք այդ ուղղությամբ շարժվել, սակայն ոչ պաշտոնապես այդ ցուցակները հրապարակելով»,-հավելեց Հարությունյանը: