Ձեր վստահելի աղբյուրը

Տաք հունվարն ու փետրվարը գյուղացուն ստիպեցին սովորականից շուտ սկսել հողի աշխատանքները: Խաղողի թաղած վազերն արդեն բացել են, էտը սկսել: Արարատյան դաշտում ծաղկած հատուկենտ ծիրանենիներ էլ  կան:

«Ինչպես մենք կանխատեսել էինք,  մինչև մարտի 15-ից Արարատյան հարթավայրում կդիտվի  ծիրանենու մասսայական  ծաղկում: Համեմատության համար նշեմ, որ անցյալ տարի ծիրանենին ծաղկել է մարտի 25-ից հետո, առանձին տարիներին՝  ապրիլի սկզբին: 15-20 օր առաջանցիկ տեմպ է գրանցվել գարնան գյուղացիական աշխատանքների կազմակերպման գործում»,-Panorama.am-ի հետ զրույցում ասաց գյուղատնտեսության փոխնախարար Գառնիկ Պետրոսյանը:

Խաղողի որթերում արդեն առատ հյութ կա:  Գյուղատնտեսության փոխնախարարը խորհուրդ է տալիս հյութի կորուստներից խուսափելու համար էտի աշխատանքներն արագ ավարտել:
Պտղատու ծառերի շուտ ծաղկելը, մտահոգում է գյուղատնտեսներին ու ոլորտի պատասխանատուներին: Ցրտահարության վտանգ կա: Պաշտոնյան հողագործներին հորդորում է չխաբվել տաք եղանակին ու բաց բնահողում սածիլ ու ցանք չկատարել:

«Դեռևս մինչև ապրիլի 25-ը Արարտյան դաշտում կա ցրտահարության վտանգ: Մենք հենց այդ ժամանակից հետո ենք խորհուրդ տալիս  բաց բնահողում կատարել բանջարաբոստանային ցանքի ու սածիլման աշխատանքները»,-ասաց Պետրոսյանը:

Փոխնախարարը նաև թվարկեց այն պտուղներն ու բանջարեղենները, որոնք աճեցնելու դեպքում գյուղացին իրացման խնդրի առաջ չի կանգնի: Դրա մասին՝ տեսանյութում: