Ձեր վստահելի աղբյուրը

Այս օրերին Մոսկվայում ընթացող շախմատի աշխարհի չեմպիոնի կոչման հավակնորդների մրցաշարը համաշխարհային առաջատար լրատվամիջոցների ուշադրության կենտրոնում է: Մրցաշարի մեկնարկից առաջ ռուսական հայտնի GQ պարբերականը հարցազրույց է վերցրել մասնակիցներից: Ստորև ներկայացնում ենք Լևոն Արոնյանի հետ հարցազրույցը:

- Ո՞վ կլինեիք, եթե շախմատ չխաղայիք:
- Կզբաղվեի արվեստով, երաժշտությամբ կամ դրանց մոտ այլ մասնագիտությամբ, որում հնարավոր է դրսևորվել:

- Ինչպիսի՞ն եք Ձեզ տեսնում 10 տարի անց:
- Աշխատում եմ չմտածել այդ մասին, չգուշակել: Ես մարդ եմ, ով միշտ ընդառաջ է գնում կյանքին, ուստի ինձ համար շատ դժվար է կանխատեսել:

- Ի՞նչ խորհուրդ կտաք կարդալ կամ նայել այն մարդկանց, ովքեր հետաքրքրվում են շախմատով:
- Մեր խաղում յուրաքանչյուր մարդ կարող է գտնել այն, ինչը մոտ է իրեն: Սկզբունքորեն այն գեղեցկությունը, մաթեմատիկական, տրամաբանական ու դերասանական կազմը, որը կարելի է գտնել՝ սովորելով խաղալ շախմատ, չի բավարարում ժամանակակից հանրությանը: Շախմատի շնորհիվ կարելի է սովորել ավելի ազատ լինել, հնարավոր է՝ նաև կանխագուշակել, թե ուր և ինչպես կգնա ժամանակը: Կարող եմ խորհուրդ տալ Յասունարի Կավաբատիի «Գո խաղի վարպետը», Գերման Հեսսեի «Բիսեր խաղը» գրքերը: Դրանք շատ մոտ են շախմատային խաղին: Շախմատի մասին ֆիլմեր քիչ եմ տեսել:

- Հիշեք մի դրվագ կյանքից, երբ շախմատում ձեռք բերած փորձն օգնել է:
- Դրանք տարբեր դեպքերում օգնել են ինձ ողջ կյանքիս ընթացքում: Հաճախ է լինում, երբ մարդուն երկու կողմից ես նայում: Ենթադրենք՝ շախմատում դու թույլ զինվոր ունես, սակայն եթե աշխատես նրա ուղղությամբ, կարող է ուժեղ դառնալ: Ուստի մարդկանց մեջ միշտ փորձում եմ տեսնել պոտենցիալ առավելությունը, այսինքն՝ լավը տեսնել:

- Ասում են՝ կանայք սիրում են խելացի տղամարդկանց: Դուք դա ճշմարտություն համարո՞ւմ եք:
- Կարծում եմ՝ այո: Այնպես է դասավորվել, որ կանայք սիրում են հաջողակ տղամարդկանց, իսկ հաջողակները սովորաբար խելացի են:

- Ո՞ւմ հետ կուզեիք հայտնվել նույն խաղատախտակի առջև:
- Կարող եմ հիշել իմ հայրենակից Տիգրան Պետրոսյանին, ով աշխարհի 9-րդ չեմպիոնն է: Կուզեի խաղալ նրա հետ:

- Եթե ժամանակակից ջենտլմենն սկսի զբաղվել շախմատով, ինչպե՞ս կփոխվի նրա կյանքը:
- Շատ հարցերում, եթե մինչ այդ շախմատ խաղալ չի իմացել, նրա համար հենարան կլինի, որովհետև, բացի քննադատական ու վերացական մտածողությունից, ավելանում է նաև ընկալումը, որ յուրաքանչյուր քայլ շատ բան է փոխում, և մարդն սկսում է ավելի բարձր գնահատել իր ժամանակն ու կյանքը: