Ձեր վստահելի աղբյուրը

««Հին Երևան» նախագիծը նոր բան չէ, դեռևս  1970-ականներին Գրիգոր Խանջյանը նման նախաձեռնությամբ հանդես եկավ, սակայն Խորհրդային միության փլուզումից հետո այլակերպվեց այդ գաղափարը:  Հիմա ով ինչ ուզում, անում է:

Փարիզի կենտրոնում հարյուրավոր հեկտարներով այգիներ կան, որոնք պահպանվել են այնպես, ինչպես եղել են 200 տարի առաջ:  Տոկիոյի կենտրոնում փայտաշեն տները  պահպանելով՝  կառուցել են ահռելի շենքեր, որոնք մի տեսակ կարծես դարձել են հնությունները պահպանողները:

Կողմ եմ հինը պահպանելուն: Հասկանում եմ, որ դժվար է, ծախսատար, սակայն …

Մեր նորահարուստներն ագահաբար ուզում են անընդհատ փող աշխատել: Իսկ առաջին հարկերն ամենալավն են վաճառվում: Դրա համար հին տները շատ դեպքերում քանդում են, տեղում էլիտար, եվրոռեմոնտով տարածքներ ստեղծում՝ խանութ, ռեստորան բացելու համար: Մոռանում են, որ օտարը գալիս է Հայաստան, Երևան՝ տեսնելու հարյուր, երկու հարյուր տարի առաջ ստեղծված մեր մշակութային արժեքները, ինչ կենցաղով են ապրել հայերը: Իսկ այն, ինչ իրենք տեսնում են Երևանում, իրենք շատ ունեն:

Չի կարելի անխնա ոչնչացնել: Այդպես մեր կենսագրությունն ենք մոռանում, ոչնչացնում, առանց կենսագրության անհասկանալի կենդանիներ են լինում: Ասում են համարակալում են հին շենքերը՝ նախքան քանդելը: Սակայն բուլդուզերներով քանդում են, էլ ինչ համարակալման մասին է խոսքը: Ամեն մի շենք իր միջավայրում է արժեքավոր:

«Հին Երևան» նախագծով ստեղծված շենքերն արհեստական են լինելու, նոր տեխնոլոգիաներով կառուցված: Այդպես չի կարող վերստեղծվել քո պատմությունը: Բոլորը կկարդան, որ այս կամ այն շենքը կառուցվել է 20....թվականին, պատմական հիշողությունը չի պահպանվի»:

ՀՀ կառավարության 2014թ. նոյեմբերի 6-ի 1227-Ա որոշման (Երևան քաղաքի Գլխավոր պողոտայի՝ Աբովյան, Փավստոս Բուզանդի, Եզնիկ Կողբացու և Արամի փողոցներով պարփակված և Երևան քաղաքի Կոնդ թաղամասում գերակա հանրային շահ ճանաչված տարածքներում կառուցապատման նախապատրաստական միջոցառումների մասին) 3-րդ կետով Հայաստանի Հանրապետության քաղաքաշինության նախարարին պատվիրակվել էր՝ ապահովել Երևան քաղաքի Գլխավոր պողոտայի՝ Աբովյան, Փավստոս Բուզանդի, Եզնիկ Կողբացու և Արամի փողոցներով պարփակված տարածքներում, «Հին Երևան» համալիրի կառուցապատման նախագծի մշակումը: «Հին Երևան» նախագծի հեղինակն ու  ճարտարապետը Լևոն Վարդանյանն է: Ծրագրում ընդգրկված է 30 հուշարձան: 2014-ին ՀՀ կառավարությունն ի դեմս ՀՀ քաղաքաշինության նախարար Նարեկ Սարգսյանի, «Մուլտիկոնտինենտալ Դիստրիբյուշն» ՍՊԸ-ն՝ ի դեմս շվեյցարաբնակ ներդրող Վարտան Սիրմակեսի լիազորված անձ Գևորգ Մաչանյանի, համաձայնագիր է ստորագրվել «Հին Երևան» կառուցապատման ներդրումային ծրագրի վերաբերյալ: Նախնական հաշվարկներով, ծրագրի իրականացման համար անհրաժեշտ է 120-150 միլիոն դոլար: Ծրագրի ավարտի վերջնաժամկետն է 5 տարի: Նշվում է, որ այս տարի արդեն  կսկսվեն լայնածավալ աշխատանքներ: Այս տարվա փետրվարի 25-ին գործադիրն ընդունել է Երևան քաղաքի գլխավոր պողոտայի՝ Աբովյան, Փավստոս Բուզանդի, Եզնիկ Կողբացու և Արամի փողոցներով պարփակված տարածքների նկատմամբ բացառիկ՝ գերակա հանրային շահ ճանաչելու մասինորոշում: Դա հնարավորություն կտա ավարտին հասցնել քաղաքաշինական ծրագրի իրականացումը, որով մասնավոր ներդրումների հաշվին Երևանի կենտրոնից կվերանա կիսախարխուլ ոչ սեյսմակայուն, ոչ բավարար խտությամբ և հիմնականում վթարային հանդիսացող բնակելի ֆոնդը և գլխավոր պողոտայի վերոնշյալ տարածքում հնարավոր կլինի վերականգնել «Հին Երևան» պատմաճարտարապետական միջավայրը: