«Հասարակությունն ու պետությունը գոյություն կունենան միայն սոցիալական պաշտպանության ամուր համակարգի պայմաններում»
Սոցիալական պաշտպանությունը պետության բաղկացուցիչ մասն է, որն իր մեջ ամփոփում է և՛ կրթությունը, և՛ առողջապահությունը, և՛ սոցիալական ապահովությունը: Այս մասին այսօր Երևանի պետական համալսարանում կազմակերպված «Սոցիալական պաշտպանության պետական համակարգը՝ անկախության պայմաններում» թեմայով գիտաժողովի ժամանակ ասաց ԱԺ սոցիալական հարցերի մշտական հանձնաժողովի նախագահ Հակոբ Հակոբյանը:
«Մենք պետք է կարողանանք մարդկանց կրթել, առողջ պահել, որպեսզի նրանք աշխատեն, ստեղծեն, բայց սոցիալական ապահովության ոլորտում չլինեն, քանի որ դա այն ոլորտն է, որտեղ պետությունը մեծ փողեր է ծախսում, իսկ արդյունքը քիչ է: Ցավոք, պետությունները չեն կարող դրանից խուսափել, մարդիկ լուծումները գտել են տարբեր ճանապարհներով: Մենք ժառանգել ենք վատ սոցիալական ապահովության համակարգ, որտեղ ամբողջ նպատակը եղել է նախ՝ քաղաքական ցուցադրությունը, հաջորդը՝ մարդկանց հետ խոսել են հետևյալ լեզվով՝ դու չես կարող, ահա քո բաժին քիչ փողը վերցրու և ձայնդ կտրի: Սա է եղել հոգեբանությունը»,- նշեց Հակոբ Հակոբյանը:
Սակայն, ըստ նրա, այժմ փորձում են շեղվել այդ հոգեբանությունից, քանի որ հասկանում են՝ մարդիկ ի ծնե լինում են տարբեր՝ նախաձեռնող, աշխատողներ, և մարդիկ, որոնք պետության օգնության կարիքն ունեն:
«Այդ օգնելու խնդիրը լուծում է սոցիալական համակարգը, և մենք այսօր գործող օրենսդրությամբ մի քայլ առաջ ենք գնացել: Ասում ենք, որ պետք է ունենանք սոցիալական աշխատող, որպեսզի կարողանանք համայնքներում օգնել և հոգ տանել այն մարդկանց մասին, ովքեր ունեն առաջնային օգնության խնդիր»,-ասաց Հակոբ Հակոբյանը:
Երևանի պետական համալսարանի ռեկտոր Արամ Սիմոնյանն էլ նշեց, որ հասարակությունը և պետությունը կարող են գոյություն ունենալ միայն սոցիալական պաշտպանության ամուր համակարգ ստեղծելու պայմաններում: Սակայն, ըստ նրա, սոցիալական պաշտպանության պետական գործուն համակարգը թանկ հաճույք է:
«Այն, ինչ որ արվում է այսօր մեր շատ նեղ հնարավորությունների պայմաններում, կարելի է միայն ողջունել, քանի որ այս տարիների ընթացքում ձևավորված համակարգը, ծառայությունները, որի ազդեցությունը նաև կրթական համակարգն է զգում, ցույց է տալիս, որ չնայած բոլոր դժվարություններին, ՀՀ-ում սոցիալական պաշտպանության պետական համակարգը սկսել է գործել»,- նշեց ռեկտորը:
Իսկ թե ինչքան կտևի դրա ձևավորումը, Արամ Սիմոնյանը դժվարացավ ասել, սակայն հույս հայտնեց, որ կգա մի ժամանակ, երբ կհպարտանանք փոքր երկրի սոցիալական պաշտպանության համակարգի արդյունքներով:
Նրա խոսքերով՝ այսօր սոցիալական պաշտպանության համակարգի մի մասը դարձել են կրթության ոլորտի աշխատակիցները. «Մենք մեր ամենօրյա գործունեության արդյունքում զգում ենք, որ մենք էլ ունենք պարտավորություններ և պարտականություններ այս համակարգում: ԵՊՀ-ն, սոցիոլոգիայի ֆակուլտետը և ողջ կոլեկտիվն այս խնդիրներով մտահոգ է և պատրաստ է իր լուման ներդնել այս կարևոր գործում»:
Լրահոս
Տեսանյութեր
Նարեկ Մալյանն ազատության մեջ է
