Ձեր վստահելի աղբյուրը

Վ. Սարգսյանի անվան ռազմական ինստիտուտում կուրսանտ Հայկազ Բարսեյանի սպանության գործով այսօր Երևանի Ավան և Նոր Նորք վարչական շրջանների ընդհանուր իրավասության դատարանում իրենց փորձագիտական եզրակացությունն են ներկայացրել դատահոգեբանական փորձագետներ՝ ակադեմիկոս Էլդա Գրինը և հոգեբանական գիտությունների թեկնածու Մարիամ Մեհրաբյանը։

Էլդա Գրինը հայտարարեց, որ Հայկազ Բարսեղյանի ձեռագիրն են հետազոտել և պարզվել է, որ այդ գրությունը տուժողը՝ ինքը Բարսեղյանը, չի գրել:

Հայկազ Բարսեղյանի դաժան սպանությունը տեղի էր ունեցել հունվարի 29-ին. ըստ պաշտոնական տեղեկության, ժամը 06:35-ի սահմաններում զորամասի մարզահրապարակում հայտնաբերվել էր նույն զորամասի զինծառայող Հայկազ Արկադիի Բարսեղյանը՝ պտտաձողի վրա պարանով կախված վիճակում:

Դեպքի առթիվ ՀՀ քննչական կոմիտեի զինվորական քննչական գլխավոր վարչությունում հարուցվել էր քրեական գործ՝ ՀՀ քրեական օրենսգրքի 104-րդ հոդվածի 2-րդ մասի 7-րդ կետով:

Բարսեղյանի բաճկոնի գրպանից հայտնաբերվել էր գրություն, որում նշված է եղել հետևյալը. «Ոչ մեկ մեղավոր չի ու կապ չունի, ուղղակի հոգնել եմ ու անհետաքրքիր ա, քաշքշուկի համար կներեք»։

Ավելի վաղ Հայկազ Բարսեղյանի իրավահաջորդ` հոր` Արկադի Բարսեղյանի ներկայացուցիչ-փաստաբան Գարիկ Գալիկյանը Panorama.am-ի թղթակցի հետ զրույցում ասել էր, որ դատաբժշկական փորձաքննության արդյունքների համաձայն,  Հայկազը մինչև  կախաղանը արդեն մահացած է եղել:

Կատարվածը մեծ աղմուկ էր բարձրացրել ինստիտուտում` հրաժարական էր ներկայացրել ինստիտուտի նախկին պետ Մարտին Կարապետյանը, նշանակվել էր նորը`գեներալ-մայոր Արմեն Ղահրամանյանը: Բացի այդ, ողբերգական դեպքից հետո պաշտպանության նախարարի հրամանով աշխատանքից ազատվել էին ռազմական ինստիտուտի պետի տեղակալներ, գնդապետներ Արմեն Ռազմիկի Մզիկյանը, Զարմիկ Անդրանիկի Թևոսյանը, Պողոս Գարուշի Աբրահամյանը, ինչպես նաև մի շարք այլ սպաներ:

Դատարանում այսօր տուժողի իրավահաջորդի ներկայացուցիչ, փաստաբան Գարիկ Գալիկյանը փորձագետներից հետաքրքրվեց՝ արդյոք ուսումնասիրե՞լ են Հայկազ Բարսեղյանի կողմից նկարած նկարները և արդյոք դրանք հուշո՞ւմ են, որ մարդը կարող էր ինքնասպանություն գործել, Էլդա Գրինը պատասխանեց.

«Նրա նկարները չեն խոսում հուսահատության այն աստիճանի մասին, որը կբերեր ինքնասպանության։ Իհարկե, կան նկարներ, որոնք տխուր են, բայց ընդամենը տրամադրության անկում է, ինչպես լինում է ցանկացածիս մոտ։ Հուսահատության հոգեվիճակ չկա նրա նկարներում»։

Մյուս փորձագետի՝ Մարիամ Մեհրաբյանի դիտարկմամբ, գրության մեջ նշված «քաքշուկ» բառը սովարաբար չի գործածվում ինքնասպանություն գործածա անձանց կողմից:

«Ինքնասպանություն գործող մարդուն չի հետաքրքրում ապագան, իսկ այդտեղ այդ բառը անգամ գրված է մեծատառով, այսինքն՝ ընդգծած է, ինչը չի կարող համապատասխանել ինքնասպանություն գործող մարդու հոգեբանությանը։ Ինքնասպանության եզրին գտնվող մարդը ունենում է նեղ երևակայություն ու ապագայում տեղի ունենալիքի համար չի մտահոգվում»,- նկատեց մասնագետը։