Ձեր վստահելի աղբյուրը

Համահայկական բնապահպանական ճակատի նախաձեռնող խմբի անդամ Լևոն Գալստյանը Հայաստանի էներգետիկ անվտանգության ապահովման տեսակետից դրական քայլ որակեց Ազգային Ժողովի կողմից Էներգախնայողության և վերականգնվող էներգետիկայի մասին օրենքում փոփոխություններ ու լրացումներ կատարելու վերաբերյալ օրենսդրական փաթեթի ընդունումը: Միաժամանակ նա կատարված օրենսդրական աշխատանքը բավարար չի համարում, պետք են  առկա բացերը հստակեցնող ենթաօրենսդրական ակտեր:

«Մենք շատ վատ նախադեպեր ունենք, որ նույնիսկ լավ օրենքներն ու որոշումները վատ մասնագիտական վերլուծության ու քննարկման հետևանքով վատ արդյունք են տալիս: Պետք է լուրջ մասնագետների, նույնիսկ գիտնականների ներուժն օգտագործվի: Պետք է որոշում կայացնելիս առաջնորդվել ոչ թե ինչ-որ մարդկանց, այլ իրականության շահերից ելնելով»,- Panorama.am-ի հետ զրույցում ասաց Լևոն Գալստյանը:

Նա նկատեց, որ մինչ օրս հայաստանյան օրենսդրությամբ արևային էներգիայի վերաբերյալ որևէ դրույթ չկար:

Օրենքի ընդունմամբ,  հնարավորություն տրվեց մինչև 150  վտ հզորությամբ էլեկտրաէներգիա արտադրող արևային էներգիայի կայաններ տեղադրել առանց լիցենզիայի:

«Մարդիկ հնարավորություն կունենան օգտագործել բնության տվածը, կայաններ տեղադրել տանիքներին, ստացած էներգիան օգտագործել իրենց կարիքների համար: Իսկ ավելցուկի դեպքում օրենքը հնարավորություն է տալիս վաճառել ՀԷՑ-ին»,-ասաց Գալստյանը, նկատելով, որ օրենքի ընդունումից հետո անհրաժեշտ են մի շարք ենթաօրենսդրական ակտեր, որոնցից մեկով էլ կսահմանվի, թե ինչ գնով է քաղաքացին  իր էլեկտրաէներգիան վաճառելու ՀԷՑ-ին:

«Այդ գնի սահմանմամբ կորոշվի, ոլորտը կզարգանա՞, թե՞ ոչ»,-ասաց նա:

Ոլորտի զարգացման համար, ըստ Գալստյանի, լուրջ արտոնություններ պետք է սահմանվեն: Նա մտածում է, որ կայաններն ավելի էժան կլինեն, եթե դրա մասերը դրսից բերվեն ու Հայաստանում հավաքվեն, այդպիսով նաև նոր աշխատատեղեր կստեղծվեն:

«Ի վերջո, կարելի է  նաև Հայաստանում նման կայանների արտադրություն կազմակերպել: Բացի այդ էլ, ցածր տոկոսադրույքով վարկեր պետք է տրամադրվեն այն մարդկանց, ովքեր ցանականում են նման կայաններ տեղադրել»,-նշեց Գալստյանը, ավելացնելով, որ նման կայանների տեղադրումը բավականին թանկ արժե:

Օրինակ, միջին մակերեսով բնակարանի համար նախատեսված կայանի տեղադրումն ամենաքիչը կարժենա 5-6 հազար դոլար:

«Եթե մի քանի հոգի տեղադրեն, մարդիկ տեսնեն, որ արդյունավետ տարբերակ է, ժողովուրդը կսկսի մասայական կերպով նման կայաններ տեղադրել, ինչպես եղավ արևային ջրատաքացուցիչների դեպքում»,-ասաց Գալստյանը:

Համահայկական բնապահպանական ճակատի նախաձեռնող  խմբի անդամը նկատեց, որ արևային էներգիայի արտադրության պարագայում բնության պատճառած վնասն էլ անհամեմատ ավելի քիչ է:

«Եթե մենք կարողանանք օգտագործել մեր ունեցած արևային լուրջ պաշարը, ապա կկարողանանք հասնել էներգետիկ անվտանգության ու անկախության: Եթե եվրոպական երկրներն իրենց ջերմային ու արևային էներգիայի պայմաններում կարողանում են ապահովել իրենց ծախսած էներգիայի 20-30 տոկոսը, մենք կարող ենք ապահովել 50-60 տոկոսը: Գերմանիայի համամետ մեր պոտենցիալը 2 անգամ ավելի շատ է, իսկ Գերմանիան այսօր մոտեցել է 25-30 տոկոսի»,-ասաց նա:

Գալստյանը նկատեց, որ վերջին մի քանի տարիների ընթացքում կայանների տեղադրման ծախսերն արագորեն կրճատվել են, ու այդ միտումը շարունակվում է: Շուտով այն մրցունակ էլեկտրաէներգիա է լինելու:

Հիշեցնենք, որ մարտի 14-ին ԱԺ-ն միաձայն ընդունել է «Էներգախնայողության և վերականգնվող էներգետիկայի մասին» ՀՀ օրենքում լրացումներ և փոփոխություններ կատարելու մասին» և դրան կից մի շարք օրենքներում փոփոխություններ նախատեսող օրենսդրական փաթեթը:

Պատգամավորներին նախագիծը ներկայացնող  էներգետիկայի և բնական պաշարների նախարարի տեղակալ Արեգ Գալստյանը հայտնել է, որ առաջարկվող փոփոխություններով միջնաժամկետ հեռանկարում էներգետիկ համակարգում կստեղծվեն նորագույն տեխնոլոգիաների կիրառմամբ արտադրական նոր հզորություններ, այդ թվում՝ արևային էներգիայի կիրառմամբ, որոնք զգալիորեն կթեթևացնեն էներգետիկ համակարգում գործող արտադրական հզորությունների բեռը՝ նվազեցնելով կախվածությունը ներկրվող ածխաջրածնային վառելիքներից: Դրա արդյունքում կդիվերսիֆիկացվի ՀՀ տնտեսությունը՝ էներգակիրների մատակարարման այլընտրանքային ուղիների ապահովման և նորագույն տեխնոլոգիաների կիրառման տեսակետից և կբարձրանա էներգետիկ անկախության աստիճանը:

ՕԵԿ պատգամավոր Իշխան Խաչատրյանը նշել է, որ  փաթեթի ընդունումը կարևոր նշանակություն կունենա երկրի տնտեսական, էներգետիկ անկախության և անվտանգության ամրապնդման համար: Հովհաննես Մարգարյանը կարևորել է նախաձեռնությունը և նշել, որ այն թույլ կտա էլեկտրաէներգիայի բնագավառում ունենալ խնայողություններ, ինչպես նաև հարկային արտոնություններ կտրվեն իրականացնողին՝ նոր վերականգնվող էներգետիկ ռեսուրսների օգտագործման ժամանակ: ՀԱԿ պատգամավոր Հրանտ Բագրատյանը, կողմ լինելով նախաձեռնությանը, նշել է, որ նման օրենքները պետք է ընդունել ծրագրային դիտակետով: