Ձեր վստահելի աղբյուրը

Գյումրիում այսօր շարունակվել է Ավետիսյանների ընտանիքի սպանության համար մեղադրվող ռուս զինծառայող Վալերի Պերմյակովի դատավարությունը:

«Ազատություն» ռադիոկայանը Գյումրիից փոխանցում է, որ Շիրակի մարզի ընդհանուր իրավասության դատարանում Պերմյակովի գործով այսօրվա դատական նիստում, ինչպես նախորդ նիստում էր, հրապարակվել են նախաքննության նյութերը՝ 26 հատոր քրեական գործը պետք է դատական նիստերի ընթացքում թերթվի, և հրապարակվեն կարևոր փաստաթղթերը, դատաբժշկական փորձաքննությունների եզրակացությունները, տեղազննությունների արդյունքները:

Մասնավորապես, ըստ աղբյուրի, հրապարակվել են լուսանկարներ, թե ինչպես է հայ-թուրքական սահմանին հայտնաբերվել Պերմյակովը՝ այն տնակը, որտեղ նա թաքնվել էր, վայրը, որտեղ արձակվել էր նախազգուշական կրակոցը և նրան հայտնաբերել էին ռուս սահմանապահները:

Տուժողների իրավահաջորդի ներկայացուցիչ, փաստաբան Երեմ Սարգսյանը «Aravot.am»-ի հետ զրույցում ասել է, որ Պերմյակովը, ամենայն հավանականությամբ, տեսել է տնակը ու պատահաբար ներս մտել:

«Նա հատուկ նպատակով գնացել է այդ տնակը՝ այդպիսի տեղեկություն չունենք:Ես իմ գործընկերոջ հետ գնացել եմ սահման, տեսել եմ, որ այդպիսի տնակ կա ու պատկերացրել, որ ցանկացած մեկը կարող էր ներս մտնել: Այլ հարց է, որ պետք է ճշտել, թե Պերմյակովը որքանո՞վ է ճիշտ կամ սխալ ասում, թե՞ ինքը եղել է այդ տնակում և կփորձենք քննության վերջնական արդյունքում հասկանալ: Առարկայական վկայող հետքեր, որ Պերմյակովը եղել է այդ տնակում, չկան:

Իր ցուցմունքն է միայն, որ նա մնացել է այդ տնակում ու դեպքի վայրի զննությունն է, որ կա այդպիսի տնակ: Այդ տնակը ջրի պոմպի կողքին է և օգտագործվում է շինարարների մնալու համար: Այնպես չէ, որ սա տնակ է բնակության համար, այլ սպասարկման համար նախատեսված տնակ է»,- ասել է Երեմ Սարգսյանը:

«Ազատություն» ռադիոկայանի փոխանցմամբ, հրապարակվել է նաև հրազենի փորձաքննությունների եզրակացությունը, ներկայացվել են փորձաքննության լուսանկարները՝ ԱԿՍ-74 տիպի ինքնաձիգի և դեպքի վայրից հայտնաբերված պահունակում գտնվող փամփուշտների:

Սրան զուգահեռ՝ Ավետիսյանների իրավահաջորդների շահերը ներկայացնող փաստաբաններն արձանագրում են, որ դատավարության ընթացքում ավելի ու ավելի հրատապ է դառնում Պերմյակովի արդեն իսկ զորացրված ծառայակիցների և նախկին անմիջական հրամանատարի հարցաքննության հարցը: