Ձեր վստահելի աղբյուրը

Արմավիրի մարզի Առատաշեն համայնքում ապրիլի 17-ին կայանալիք գյուղապետի ընտրություններն աչքի են ընկնում Հանրապետական թեկնածուների առատությամբ: Կենտրոնական ընտրական հանձնաժողովի պաշտոնական կայքէջից Panorama.am-ը տեղեկացավ, որ այս համայնքում առաջադրված է 5 թեկնածու, մեկը՝ անկուսակցական Հովհաննես Անդրեասյանը, մնացածը՝ ՀՀԿ-ական: Ուշագրավ է, որ բոլոր թեկնածուներն էլ ինքնաառաջադրված են, այսինքն ՀՀԿ-ն չի սատարի նրանցից որևէ մեկին:

ՀՀԿ-ական թեկնածուներից մեկը գործող գյուղապետ Սարգիս Հարությունյանն է, մյուսը՝ ավագանու անդամ Զավեն Ինջիղուլյանը,  հաջորդը՝ գյուղի դպրոցի պահակ Արտակ Ղազարյանը,  և վերջապես Համազասպ Երանյանը:

Գյուղապետն ասում է՝ չգիտի, թե ինչով է պայմանավորված առայժմ իր կողմից զբաղեցրած պաշտոնի շուրջ նման մեծ հետաքրքրությունը: 2012-ին երբ ինքն ընտրվել է, ընդամենը երկու թեկնածու է  առաջադրված եղել:

«Ավելի շուտ մտածենք, որ վատ չեմ ղեկավարել, դրա համար է հետաքրքրությունը մեծ: Կամ էլ մտածում են, որ իրենք ավելի լավ կարող են ղեկավարել»,-ասաց նա:

Panorama.am-ի հետ զրույցում գործող գյուղապետն ասաց, որ կուսակցությունում հանդիպում է եղել: 

«Ամեն դեպքում չորսն են, բոլորն էլ, ինձ թվում է՝ արժանի թեկնածուներ են: Որևէ մեկին առավելություն տալու խնդիր չկա, ինձ թվում է: Ես գտնում եմ, որ այդպես ճիշտ է: Ինձ թվում է, բոլորին էլ նույն բանն են ասել»,-ասաց գյուղապետը:

Սարգիս Հարությունյանի խոսքով, մյուս թեկնածուների պես ինքն էլ իր ընտրվելու հնարավորությունը բարձր է գնահատում. «Զավեն Ինջիղուլյանը իմ ընկերն է, Ղազարյան Արտակն էլ»:

Միգուցե պայմանավորվածություն կա՞, որ ընտրապայքարի ընթացքում ինքնաբացարկ են հայտնելու: Հարցին ի պատասխան գյուղապետն ասած, որ նման բան չկա. «Ինչքան գիտեմ,  բոլորն էլ պայքարելու են»:

3 հազարից ավելի բնակիչ ունեցող գյուղում ընտրողների թիվը 2100 է: Նրանցից 600-ը գյուղում չեն ապրում: Գյուղապետ ընտրվելու համար 450 և ավելի գյուղացի պետք է միաժամանակ քվեարկի թեկնածուներից մեկի օգտին:

Հիշեցնենք, որ ապրիլի 17-ին ՏԻՄ ընտրություններ են նշանակված Արարատի, Արմավիրի, Լոռու, Վայոց Ձորի, Արագածոտնի, Կոտայքի, Գեղարքունիքի, Սյունիքի մի շարք համայնքներում: Առաջադրումնեը մեկնարկել են մարտի 13-ից: Առաջադրումների ժամկետն ավարտվեց մարտի 18-ին՝ ժամը 18-ին:

Նախընտրական քարոզչությունը կմեկնարկի մարտի 30-ին և կշարունակվի մինչև ապրիլի 15-ը: Թեկնածուներն ինքնաբացարկի դիմումներ կարող են ներկայացնել մինչև ապրիլի 7-ը՝ ժամը 18:00-ն: