Ձեր վստահելի աղբյուրը

Հայ Ազգային կոնգրես-Նիկոլ Փաշինյան հեռակա երկխոսությունը կարծես դադարել է, և Քաղաքացիական պայմանագիր կուսակցությունում ընդունել են իրավիճակն այնպես ինչպես կա ու պատրաստվում են Հրազդանի քաղաքապետի ընտրություններին:

Հիշեցնենք՝ Նիկոլ Փաշինյանը, որպես Հայ Ազգային կոնգրես դաշինքի խմբակցության անդամ, նամակով միջնորդել էր խմբակցության ղեկավար Լևոն Զուրաբյանին, որպեսզի Հրազդանի քաղաքապետի ընտրությունների ժամանակ ՀԱԿ դաշինքին վերապահված հանձնաժողովի անդամների տեղերը տնօրինի և դրանցում անդամներ նշանակի Սասուն Միքայելյանի շտաբը:

Իր հարցազրույցում Փաշինյանը հայտարարել էր, որ այս հարցով խոսել է ՀԱԿ խմբակցության 3 պատգամավորի հետ, որոնք համաձայնել են, և, ինքն էլ նրանց հետ միասին՝   խմբակցության 7 անդամներից 4-ը կողմ են, որպեսզի Սասուն Միքայելյանը նշանակում կատարի:

Այնուհետև, Հայ Ազգային կոնգրեսը հանդես եկավ հայտարարությամբ, որով, ըստ էության, մերժում էր Փաշինյանի առաջարկը. Մերժման հիմքն այն էր, որ ՀԱԿ-ը Հրազդանում ունի «անհրաժեշտ ռեսուրսներ»: Նույն հայտարարության մեջ նշվում էր նաև, որ խմբակցության որևէ անդամից այդ հարցի վերաբերյալ խմբակցության նիստ հրավիրելու մասին դիմում չի ներկայացվել:

Ապա իրադարձություններն այնպես զարգացան, որ Փաշինյանն առաջարկեց հարցը քննարկել խմբակցության նիստում ու նիստը անել բաց, քանի որ խնդիրը մեծ արձագանք էր ստացել:

«Խնդիրն այն է, որ Նիկոլ Փաշինյանը որպես ՀԱԿ դաշինքի համամասնական ցուցակով խորհրդարան անցած պատգամավոր և Սասուն Միքայելյանը, ով եղել է այդ ցուցակում և բարձր հորիզոնականում՝ 13-րդում ու շատ ձայներ է ապահովել դաշինքի համար, իրավունք ունեին նման պահանջ ներկայացնելու և ըստ դրա, խնդիրը ներկայացվել է խմբակցությանը, որպեսզի լուծում ստանա: Բայց կարծես թե մինչև հիմա լուծում չի ստացել», -Panorama.am-ի թղթակցի հետ զրույցում ներկայացրեց «Քաղաքացիական պայմանագիր» կուսակցության վարչության նախագահ Արայիկ Հարությունյանը:

Մեկնաբանելով ՀԱԿ-ից հնչող հայտարարությունները, թե ոչնչից աղմուկ է բարձրացվել, Հարությունյանն ասաց, որ ամենևին էլ աղմուկ չի բարձրացվել և խնդիրը հասարակության ու լրատվամիջոցների ուշադրության կենտրոնում է հայտնվել, և լրատվամիջոցներն էլ սկսել են լուսաբանել. «Հատուկ որևէ գործողություն չի արվել ու դրա հետ կապված հատուկ ինչ-որ դավադրություն փնտրել պետք չէ»:

Անդրադառնալով ՀԱԿ-ի հայտարարությանը, որտեղ զարմանք էր հայտնվում, որ «խմբակցության նիստին անձամբ ներկայանալու և հարց բարձրացնելու փոխարեն, պատգամավորը նամակ է ուղարկում, միաժամանակ իրեն իրավունք վերապահելով խոսելու խմբակցության այլ անդամների անունից, ինչը սկզբունքորեն անընդունելի է», ՔՊ կուսակցության վարչության նախագահն ասաց.

«Անձամբ ներկայացնելու հարցը չեմ հասկանում, որովհետև խմբակցության պատգամավորների հետ քննարկում է եղել, և խմբակցության պատգամավորը նամակով դիմել է: Հատուկ ընթացակարգ սահմանել կամ դրա հետ կապված ինչ-ինչ խնդիրներ նշել, կարծում եմ, տեղին չէ: Ընթացակարգը պահվել է. հարցը քննարկվել է առանձին պատգամավորների հետ, հետո նամակ է ուղարկվել»:

Նույն հայտարարության մեջ ՀԱԿ-ը վստահեցրել էր, որ թիվ 25 ընտրատարածքում ունեն մարդկային անհրաժեշտ ռեսուրսներ տեղամասային հանձնաժողովները համալրելու «այնպիսի անդամներով, ովքեր բազմիցս ապացուցել են օրենքների իրենց իմացությունը, օրինականության հաստատման համար պայքարելու վճռականությունը և համարձակությունը»:

Մեր հարցին, թե չի՞ վստահում ՔՊ-ն այդ հանձնաժողովականներին, մեր զրուցակիցը պատասխանեց.

«Այստեղ վստահել-չվստահելու հարց չկա, խնդիրն այն է, որ Սասուն Միքայելյանի շտաբի և «Քաղաքացիական պայմանագրի» կողմից նշանակված հանձնաժողովի անդամները շատ ավելի պարտաճանաչ կկատարեն աշխատանքը և ավելի պատրաստակամությամբ կաշխատեն: Այս պարագայում հանձնաժողովներում ՀԱԿ-ի ներկայացրած անդամների հետ խնդիրն առաջացել է այն բանից հետո, երբ օրինակ, վերջին հանրաքվեից հետո նույն ՀԱԿ-ը հայտարարեց, որ եղել են համատարած խախտումներ, բայց հանձնաժողովներում իրենց նշանակված ավելի քան 1700 անդամներից բողոք է ներկայացվել 30-40 հանձնաժողովականների կողմից»:

Մեր հարցին, թե այսինքն՝ թերի աշխատանք է կատարվել ՀԱԿ-ի նշանակած հանձնաժողովականների կողմից, Արայիկ Հարությունյանը պատասխանեց. «Թերի է եղել, թե թերի չի եղել, թվերն են խոսում այդ մասին: Թվերը կոնկրետ ցույց են տալիս անհամապատասխանություն հանձնաժողովի անդամների թվի, նրանց կատարած պարտաճանաչ աշխատանքի և ՀԱԿ-ի կողմից արված հայտարարության միջև»:

Դիտարկմանը, թե այդուհանդերձ ՀԱԿ-ական հանձնաժողովականներին վստահելու հարցում կասկածներ ունեն, Հարությունյանը պատասխանեց, որ ներկայացված թվային տվյալները «դրա մասին ամեն ինչ ասում են»:

Հետաքրքրվեցինք, թե ի վերջո ի՞նչ լուծում է տրվելու այդ հարցին, Հարությունյանը պատասխանեց, որ «Քաղաքացիական պայմանագիրը» իր դիրքորոշումը հայտնել է և հավելեց. «Ավել գործողություն այս հարցի հետ կապված չենք անելու: Շտաբն արդեն գործում է, կուսակցությունը բնականոն աշխատում է և դրանից ավել գործողություն մենք չենք անելու: Սա է եղել մեր վերջնական դիրքորոշումը»:

Նրա խոսքով, տեղամասերում հանձնաժողովի անդամները պարտավոր են հետևել օրենքի պահանջներին:

«Այսինքն եթե նրանք պատշաճ կերպով կատարում են իրենց օրինական աշխատանքը, ուրեմն դա բխում է նաև մեր շահերից: Եթե չեն կատարում պատշաճ կերպով իրենց աշխատանքը, մենք ընտրություններից հետո համապատասխան եզրակացություն կանենք: Բայց ես չեմ ուզում վատ կանխավարկածով առաջնորդվել և հենց հիմիկվանից ասել, որ խնդիրներ կունենանք: Նաև մեր կողմից ընտրությունների վերահսկման մոնիտորինգը, ցույց կտա, թե հանձնաժողովի որ անդամը ինչպես է աշխատել տեղում», -հայտարարեց Հարությունյանը: