Ձեր վստահելի աղբյուրը

«Բացի հարուստ պատմամշակութային ժառանգությունից, հրաշալի բնությունից, համով խոհանոցից, բարձրորակ ծառայություններից, Իրանի համար Հայաստանի հիմնական գրավչությունն այն է, որ իրանցիները մեր երկրում իրենց ընդունված են զգում»: Panorama.am-ի հետ զրույցում նման կարծիք հայտնեց Էկոնոմիկայի նախարարության զբոսաշրջության վարչության պետ Մեխակ Ապրեսյանը:

Նա քաղաքացիներին, մասնավոր հատվածին, լրատվամիջոցնմերին կոչ արեց պահպանել «լեգենդար հյուրասիրությամբ ու հյուրընկալությամբ» հայտնի Հայաստանի բարի համբավը:

«Երբևէ չպետք է թույլ տանք խտրական վերաբերմունք հյուրի նկատմամբ՝ անկախ ազգությունից, դավանանքից: Պետք է պահպանենք, զարգացնենք, ներկայացնենք հազարամյակների մեր նկարագիրը»,-ասաց նախարարության պաշտոնյան:

Նրա խոսքով, խտրական վերաբերմունքի մեկ-երկու դեպքը բացի նկարագիրը վնասելուց, բացասաբար են անդրադառնալու Հայաստանում զբոսաշրջության հետագա զարգացման, ներդրումների իրականացման վրա:

«Երկու շատ կարևոր խնդրանք՝ մեկ-երկու լոկալ դեպքերը չհանրայնացնել ու չներկայացնել որպես հասարակական կարծիք: Եթե զբոսաշրջիկների կողմից էլ թույլ տրվեն իրավախախտումներ կամ ոչ հարիր գործողություններ, դրանք էլ պետք չէ վերագրել ազգին: Մի խնդրանք, հորդոր նույնպես մեր մասնավոր հատվածի ներկայացուցիչներին, որևէ դեպքում թույլ չտալ խտրականության դեպքեր, սրանք վատ են անդրադառնալու մեր տնտեսության վրա, սրա հետևանքները մենք դեռ զգալու ենք»,-ասաց Ապրեսյանը:

Վարչության պետն այդպես էլ հստակ չասաց, կարողացե՞լ են ճշտել նախօրեին տարածված տեղեկությունները, որ իրանցիներին թույլ չեն տվել խանութ մտնել: Փոխարենը նման դեպքերի ականատես լինելուց նա հորդորում է զանգահարել էկոնոմիկայի նախարարություն՝ 011 59-71-56, 011 59-71-57 հեռախոսահամարներով:

Այս օրերին Երևանում հանգիստն անցկացնող իրանցիների հաշվին գրպանները միանգամից լցնել ցանկացող տաքսու վարորդներին էլ Ապրեսյանը հորդորեց խտրականություն չդրսևորել:  Նա ընդգծեց, բոլոր տաքսի ծառայությունները չէ, որ նման քայլի են դիմում:

«Չենք կարող ասել, որ տաքսի ծառայությունները համատարած խաբում են: Մի քանի դեպքեր կարող են լինել: Մեր խնդրանքն է, որ բացառեն այդ մի քանի դեպքերը ևս»,-ասաց պաշտոնյան:

Հյուրանոցների, ռեստորանների, խանութների, հանրային սննդի օբյեկտների առաջարկը հրապարակային է, և նրանք իրավունք չունեն հրաժարվել  որևէ մեկին ծառայություն մատուցել. «Եթե խանութ մտած մարդը ակնհայտ ոչ սթափ վիճակում չէ, իրենից հասարակական վտանգ չի ներկայացնում, ակնհայտորեն չի երևում, որ տառապում է ինչ-որ համաճարակային հիվանդությամբ, պատրաստ է վճարել իրեն մատուցած ծառայությունների համար, պարզապես օրենքի կոպիտ խախտում է հրաժարվել նրան ծառայություններ մատուցելուց: Նաև պախարակելի բան է, որևէ մեկս չպետք է հանդուրժի նման բան, քանի որ դա ազդում է բոլորիս իմիջի վրա»:

Այս օրերին Հայաստան այցելած զբոսաշրջիկների թվի մասին վարչությունը հստակ տվյալներ դեռ չունի: «Աչքաչափով» նախորդ տարիների համեմատ ավելի շատ իրանցիներ են եկել, Հայաստան եկածների 70 տոկոսն ընտանիքի հետ է: Նրանք հանգիստն անցկացնում են ոչ միայն Երևանում, այլ մարզերում՝ այցելելով պատմամշակութային տարբեր վայրեր:

Ապրեսյանի խոսքով, Իրանում Հայաստանն ավելի գրավիչ ու ընդունելի է դառնում, դա են փաստում Իրանից Հայաստան կատարած այցելությունների թվի աճը, 2015-ին 2014-ի համեմատ Իրանից Հայաստան այցելությունների թիվն աճել է մոտ 24 տոկոսով:

«Բացի այդ Հայաստանում զբոսաշրջային սեզոնը երկարաձգվել է: Եթե նախորդ տարիներին ակտիվ սեզոնը սկսվում էր ապրիլից, հիմա արդեն մարտից է սկսվում: Դա էլ պայմանավորված է իրանական շուկայի ակտիվացմամբ»,-ասաց Ապրեսյանը:

Նա ընդգծեց, որ զբոսաշրջությունը «սնում է» տնտեսության գրեթե բոլոր ճյուղերը:

«Նրանք և սնվում են, և հագուստ ու հուշանվերներ գնում, էլեկտրաէներգիան է շատ ծախսվում… Որքան շատ այցելություններ, այնքան մեծանում է պահանջարկը, իսկ դա նշանակում է նոր խթան: Դա մենք պետք է գիտակցենք»,-ասաց նախարարության ներկայացուցիչը: