Ձեր վստահելի աղբյուրը

«Հայֆիլմ» կինոստուդիան վերագործարկելու համար ֆինանսական շատ մեծ ներդրումներ են անհրաժեշտ: Լրագրողների հետ հանդիպման ժամանակ ասաց ՀՀ մշակույթի նախարարի տեղակալ Արթուր Պողոսյանը:

Նա նշեց, որ «Հայֆիլմ» ստուդիան գտնվում է  կառավարությանն առընթեր պետական գույքի վարչության ենթակայություն ներքո, փորձում են ներդրումներ  գտնել, հստակեցնել, թե ինչքան գույք է մնացել, ինչպես պետք է օգտագործել, մասնակի վերանորոգումներ է պետք իրականացնել:

«Վերագործարկելու համար առայժմ պետք է լուծել այդ հարցերը: Մեղմ ասած, «Հայֆիլմ» ստուդիայի գույքն անմխիթար վիճակում է»,- ասաց փոխնախարարը:

Ըստ նրա, այս պահի դրությամբ  ֆինանսական միջոցներ հնարավոր չէ գտնել: 

Ասուլիսին ներկա Հայաստանի Ազգային կիոնկենտրոնի տնօրեն Գևորգ Գևորգյանն ասաց, որ հարցը մեծ ներդրումների մասին է:

«Սիրիայի ռմբակոծված տարածքներն ավելի բարեկարգ են, քան «Հայֆիլմ» ստուդիայի տարածքը»,- նման համեմատության արեց Գ.Գևորգյանը:

Հիշեցնենք, որ  2015 թ. օգոստոսի 31-ին կառավարության ընդունած որոշմամբ, Համո Բեկնազարյանի անվան «Հայֆիլմ կինոստուդիա» փակ բաժնետիրական ընկերության 100 տոկոս բաժնետոմսերը՝ 2 միլիարդ 702 մլն 469 հազար դրամ գնահատված արժեքով, կվերադարձվի ՀՀ կառավարությանը: