Ձեր վստահելի աղբյուրը

Իրանի տուրիզմի վարչությունը երեկ հայտարարություն է տարածել, որ 60 մլն բնակիչ տուրիզմի հետ կապված տեղաշարժ է ունեցել երկրի ներսում և երկիրց դուրս: Այսօր լրագրողների հետ հանդիպմանն ասաց Հանրային ռադիոյի պարսկերեն հաղորդումների ավագ խմբագիր Տիգրան Դավուդյանը:

«Այս տարի Նոր տարին Հայաստանում նշող իրանցի զբոսաշրջիկների թիվը կգերազանցի տասը հազարը: Եթե հաշվենք, որ նրանցից յուրաքանչյուրը մոտ հազար դոլար կծախսի մեր երկրում, ապա դա շատ լավ կանդրադառնա մեր երկրի վրա»,-նշեց Հանրային ռադիոյի պարսկերեն հաղորդումների ավագ խմբագիրը:

Նրա խոսքով՝ Հայաստան այցելող իրանցիների թվի ավելացման վրա ազդեցություն են ունեցել նաև Իրանի նկատմամբ պատժամիջոցների վերացումը, բացի դրանից՝ մեր երկիրը անվատանգության առումով ապահով է նրանց համար:

«Իրանից օդային ճանապարհով Հայաստան ժամանողների մոտ որևէ խնդիր չի առաջանում: Դժվարությունները հիմնականում լինում են ցավաքային ճանապարհով եկողների մոտ, մասքսատան մոտ ուղղակի հերթեր են առաջանում, նրանք ստիպված են լինում ժամերով սպասել այդտեղ: Մաքսատան աշխատակիցներից գերլարված աշխատանք է պահանջվում»,-նշեց Տիգրան Դավուդյանը:

Արդեն երկար տարիներ Հայաստանում բնակվող Իրանի քաղաքացի տիկին Մանսուրե Անսարին էլ ասաց, որ հայերին շատ է սիրում ու հարգում:

«Այստեղ բնակարան ունենք, ամուսինս իր բիզնեսն ունի: 1993 թվականին առաջին անգամ եկանք Հայաստան՝ որպես զբոսաշրջիկ, այնուհետև ամուսինս այստեղ գործ սկսեց, աղջիկս ծնվել է այստեղ, հիմա սովորում է Բժշկական համալսարանում»,-պատմեց տիկին Մանսուրեն:

Լրագրողների հարցին, թե այս օրերին հաճախ են լուրեր պտտվում, թե հայերը դժգոհում են իրանցիների պահվածքից, իսկ իրանցիներն էլ հայերի սպասարկումից, նա պատասխանեց. «Ես արդեն երկար տարիներ եմ այստեղ, սովորել եմ ամեն ինչին: Ես դժգոհություններ չունեմ,  ուշադիր վերաբերմունք կա մեր նկատմամբ, չնայած մեկ-մեկ պատահում է, որ տեսնում են հայ չես, այլ վերաբերմունք են ցույց տալիս, երբեմն տաքսիստները փորձում են ավել գումար վերցնել»:

Ինչ վերաբերում է իրանցիների պահվածքին, նա չժխտեց, որ կան իրանցիներ, որոնք էլ  այստեղ իրենց ճիշտ չեն պահում, ինչի պատճառով էլ սկսում են բոլորի մասին վատ կարծիք կազմել:

Հանդիպմանը ներկա իրանցի զբոսաշրջիկ Օրքիդե Աբդին, ով հասցրել է շատ երկրներում լինել, ասաց, որ առաջին անգամ է Հայաստանում. «Ամուսնուս հարազատները մի քանի անգամ եղել են Հայաստանում: Այս անգամ որոշեցինք մեծ գերդաստանով գալ: Մենք շատ էինք լսել ՀՀ-ի գեղեցիկ ճանապարհների և ոլորանների մասին և որոշեցինք, որ ցամաքով գանք, բայց հերթապահության փոփոխության ժամանակ էր և ստիպվախ 4 ժամ սահմանում սպասեցինք: Ձեր երկիրը նորանկախ է, հավանաբար այդ պատճառով էլ տուրիզմի հետ կապված փորձառությունը այդքան էլ մեծ չէ, կա անգլերենի պակաս սպասարկման ոլորտում»:

Նա պատմեց, որ այս օրերին մեկ անգամ խնդիր է ունեցել խանութում, երբ վճարելու ժամանակ պարզվել է, որ ապրանքի գնի մեկ զրոն պակաս է նշված եղել և ինքը պետք է ավել վճարի:

«Երևանից բացի այլ տեղեր չեմ եղել: Տասը օր դեռ այստեղ եմ լինելու կհասցնեմ գնալ այլ տեղեր»,-ասաց իրանցի զբոսաշրջիկը, հավելելով՝ լավ է այստեղ, բայց հաջորդ անգամ էլ Հայաստան չի գա, այլ նոր երկրներ կցանկանա գնալ:

Ասուլիսի ավարտին Մանսուրե Անսարին ավելացրեց, որ  դժգոհություններ հրմանականում ունեցել են ճանապարհային ոստիկանների հետ կապված. «Մեղրիից մինչև այստեղ ճանապարհը վատն է, եղել են դեպքեր, որ մարդիկ ժամերով կանգնել են, սակայն որևէ մեկը նրան չի մոտցել օգնելու»: