Ձեր վստահելի աղբյուրը

Սիրիական բանակը, ճեղքելով ջիհադիստների պաշտպանությունը, մտել է Պալմիրա քաղաի կենտրոն: 2015թ-ի մայիսից Պալմիրան գտնվում էր  «Իսլամական Պետություն» ահաբեկչական խմբավորման զինյալների հսկողության տակ: Ըստ սիրիական պետական հեռուստաընկերություններից մեկի հաղորդման՝ կառավարական զորքերը գտնվում են Պալմիրայի կենտրոնում:Այս մասին տեղեկացնում է «Deutsche Welle»-ն:

Սիրիական հեռուստաընկերության ցուցադրած կադրերից երևում է Պալմիրայի պատմական կենտրոնը, որը ներառված է ՅՈՒՆԵՍԿՈ-ի համաշխարհային պատմամշակութային  ժառանգության ցանկում:
Պալմիրայի ազատագրման օպերացիային նախորդել է սիրիական բանակի մասշտաբային գրոհը՝ ուղեկցված ռուսական օդուժի աջակցությամբ:

Պալմիրայում, որի բնակչությունը մինչև «ԻՊ»-ի հսկողության տակ անցնելը, կազմում էր 70 հազար մարդ, այժմ չի գերազանցում 15 հազարը:

«Բնակչության ճնշող մեծամասնությունը փախել է քաղաքից, մնացել են միայն նրանք, ովքեր չափազանց աղքատ են իրենց փախուստ թույլ տալու համար»,-նշել է Սիրիայի մարդու իրավունքների դիտորդական առաքելության ընդդիմադիր խմբի ղեկավար Աբդել Ռախմանը:

Հուշարձանների պահպանության սիրիական գերատեսչության ղեկավար Մաամուն Աբդելքարիմը հայտարարել է, որ սիրիական իշխանությունները ամեն ինչ կանեն ջիհադիստների կողմից ավերված Պալմիրայի հուշարձանները վերականգնելու համար: