Ձեր վստահելի աղբյուրը

ԱՄՆ պետդեպարտամենը Հայաստանում գտնվող իր քաղաքացիներին տեղեկացնում է, Հայաստանում հասարակական տրանսպորտն էժան է, սակայն անվտանգ ու հարմարավետ չէ:

«Միկրոավտոբուսներն այստեղ առավել վտանգավոր են, քան հասարակական տրանսպորտի մյուս տեսակները: Դրանք հաճախ գերբեռնված են ու վատ պահպանված: Չեն պահպանվում անվտանգության ընդհանուր կանոնները, դրանք հաճախ ճանապարհատրանսպորտային պատահարի մասնակից են դառնում»,-ասված է պետդեպի կայքում:

Այստեղ անուղղակի և ուղղակի մի շարք մեղադրանքներ կան՝  հայ վարորդների, ճանապարհային ոստիկանության, ինչպես նաև տրանսպորտի ու կապի նախարարության, տեղական ինքնակառավարման մարմինների հասցեին:

ԱՄՆ կառավարությունն իր քաղաքացիներին նաև խորհուրդ  է տալիս չճամփորդել գիշերով, քանի որ ճանապարհները վատն են. «Բացառությամբ կենտրոնական մի քանի մայրուղիների, հիմնական ճանապարհները վատ վերանորոգված են, որտեղ կարելի է բախվել ասֆալտի մակերեսի ձգվող մեծ փոսերի: Որոշ ճանապարհներ նոր քարտեզների վրա չկան»:

ԱԳՆ մամուլի խոսնակ Տիգրան Բալայանը հրապարակված տեղեկությունները մեկնաբանելուց զերծ մնաց: Նա ասաց, որ Հայաստանի ԱԳՆ պաշտոնական էջում էլ հայաստանցի ճամփորդների համար ընդհանուր տեղեկություններ ու խորհուրդներ են հրապարակվել,  սակայն առանձին երկրների համար այս պահին  նման տեղեկություններ չկան: Առանձին դեպքերում արտերկրում գտնվող ՀՀ քաղաքացիները կարող են դիմել դեսպանություն ու ստանալ պատասխաններ:

Ճանապարհային ոստիկանության պետի տեղակալ Արթուր Տոնոյանը Panorama.am-ի հետ զրույցում ՃՈ-ին ուղղված մեղադրանքները չափազանցված համարեց, չբացառեց, որ մի քանի դեպքեր եղել են, սակայն դրանք չպետք է ընդհանրացնել: Նրա խոսքով, երթևեկության կուլտուրայի մակարդակի բարձրացումը տեսանալի է, և դա կարող են փաստել նաև քաղաքացիները:

ԱՄՆ պետդեպը նշում է. «Վարորդները հաճախ են անտեսում երթևեկության կանոնները՝ այդպիսով վտանգավոր վիճակ ստեղծելով ճամփորդների համար: Գիշերը երթևեկելիս հատկապես պետք  է ուշադիր լինել: Հետիոտները հաճախ առանց նախազգուշացման, հատում են մութ փողոցը՝ կրելով մուգ հագուստ: Վազանցը գնալով լուրջ խնդիր է դառնում  հայաստանյան փողոցներում ու մայրուղիներում: Ագրեսիվության զոհ դառնալու վտանգը նվազեցնելու համար պետք է զիջել նման վարորդներին»:

Տոնոյանն ասաց, որ ՃՈ-ն երթևեկության ցանկացած խախտման ժամանակ հստակ գնահատական է տալիս, դա վարչական իրավախախտում է, և նման յուրաքանչյուր դեպքում արագ արձագանք է տրվում:

«Հայ վարորդներն ագեսիվ չեն, միգուցե ազգային խառնվածքով պայմանավորված կա շտապողականություն, բայց դա ներկայացնել որպես ագրեսիվություն, սխալ մեկնաբանություն է»,-ասաց ՃՈ պաշտոնյան:

Ինչ վերաբերում է վազանցին, ապա Տոնոյանի խոսքով, 2012-ից հետո, երբ սկսեցին խախտումների արձանագրման նպատակով տեսահսկման սարքեր տեղադրել, վազանցի դեպքերի ինտենսիվ նվազում է նկատվում:

ԱՄՆ կառավարությունն իր քաղաքացիներին զգուշացնում է, հանգստյան օրերին  հատկապես Երևան-Ծաղկաձոր, Երևան-Սևան ճանապարհներին ավելանում է հարբած վարորդների թիվը: Ոստիկանությունը կփորձի կանգնեցնել վտանգավոր վարորդներին, բայց Երևանից դուրս նրանց ներկայությունը սահմանափակ է:

ՃՈ պետի տեղակալը, վկայակոչելով վիճակագրությունը, ասում է, որ այս առումով էլ նվազման միտում կա:
«Ճանապարհային ոստիկանության կողմից մշտապես ստուգայցեր են անցկացվում, հատկապես ամռանը հանգստյան օրերին, երբ և Սևան, և Ծաղկաձոր հոսքը շատ է լինում: Կանխարգելիչ միջոցառումներից բացի, խստացվել է օրենսդրությունը նմանատիպ վարք դրսևորող վարորդների նկատմամբ: Եթե նախկինում հարբած վարելու համար տուգանքը 100 հազար դրամ էր, ապա հիմա 200 հազար դրամ է, երկրորդ անգամ կրկնվելու դեպքում նախատեսվում է քրեական պատասխանատվություն»,-ասաց Ճանապարհային ոստիկանության ներկայացուցիչը:

Երևանից դուրս ոստիկանների  սահմանափակ լինելու վերաբերյալ դիտարկմանն էլ Տոնոյանը պատասխանում է՝ շատ են տեսահսկման սարքերը, դրան գումարած ամռան ամիսներին հենց այս ուղղություններով կիրառվում են շարժական արագաչափեր:

«Բացի այդ էլ հենց այդ ճանապարհներին ամռան ամիսներին ավելանում են ՃՈ ճանապարհապարեկային ծառայության կարգախմբերը հատկապես վտանգավոր ճանապարհահատվածներում, նրանք իրականացնում են շուրջօրյա հերթապահություն: Գիտեք, նաև  առողջապահության նախարարության կողմից շտապ օգնության հերթապահ կայաններ են գործում»,-ասաց նա:

Պետդեպի էջում նշվում է, որ ճանապարհներին հանցագործության դեպքեր հազվադեպ են լինում, սակայն եղել է,  երբ ոստիկանները կաշառք են վերցրել, երբեմն էլ անհարկի անհարմարություններ են ստեղծել ամերիկյան վկայական  կամ միջազգային վարորդական լիցենզիաներ ունեցող վարորդների համար:

«Կաշառքի  վերաբերյալ տեղեկատվության չեմ տիրապետում, և չկա»,-ասաց Panorama.am-ի զրուցակիցը:

Ինչ վերաբերում է ամերիկյան վարորդական վկայականներին, ապա Տոնոյանի խոսքով, ՀՀ-ն ընդունում է բոլոր տեսակի վկայականները, որոնք համապատասխանում են 1968 թ. նոյեմբերի 8-ի Ճանապարհային երթևեկության մասին կոնվենցիայով, ինչպես նաև դրանում հետագայում կատարված լրացումներով, փոփոխություններով վարորդական վկայականներին ներկայացվող պահանջներին:

«Դա նշանակում է, որ վարորդական վկայականի վրա լատինատառ ու արաբական թվերով պետք է հստակ գրված լինի տրանսպորտային միջոցը վարող անձի վերաբերյալ տվյալներ: ԱՄՆ քաղաքացիները հաճախ վարում են ազգային վարորդական վկայականով, որը չի համապատասխանում հիշյալ կոնվենցիայի պահանջներին, իրենք ունենում են նաև միջազգային վարորդական բազմաթերթ վկայականներ, որոնք ընդունված են Հայաստանում, ու ոչ մեկ իրավասու չէ նման վկայական ներկայացնողին ինչ-որ անհարկի պահանջներ ներկայացնել: ՃՈ աշխատակիցներն այս առումով լավ պատրաստված են»,-մանրամասնեց Արթուր Տոնոյանը:

Պետդեպի էջում գրված է. «Երևանը Իրանին ու Վրաստանին կապող ճանապարհները ծանրաբեռնված են, երբեմն երկար ժամանակ է պահանջվում ոստիկանության ու շտապ օգնության մեքենաների՝ հեռավոր շրջաններ հասնելու համար»:

ՃՈ պետի տեղակալն այս նկատառմանը ևս միանշանակ չի վերաբերվում. «Մի քանի կիլոմետրը մեկ մենք ունենք հենակետեր, ահազանգի դեպքում արագ արձագանքում են, ես չեմ տիրապետում տեղեկությունների, որ ուշացման դեպքեր են եղել: Ճանապարհային ոստիկաններն են, որ ձմռան ամիսներին էլ, դուք տեսնում եք, մարդկանց օգնում են, տեղ հասցնում սառույցի, բքի պայմաններում: Եթե ամեն ինչ հարթ ու հեշտ լիներ, ապա ճանապարհապարեկային ծառայության 50 տոկոսը կկրճատվեր»:

«Տարբեր բնակավայրերում վաճառվող բենզինի որակը տատանվում է: Ճամփեզրերին բանկայով ու այլ տարաններով բենզին կամ այլ վառելանյութ վաճառողներն արժանահավատ չեն»,-ասված է պետդեպի կայքի տրանսպորտ և ճամփորդություն բաժնում: