Ձեր վստահելի աղբյուրը

Չնայած Հայաստանի ու Վրաստանի միջև ինտեգրացիոն տարբեր վեկտորների առկայությանը, երկկողմ հարաբերություններն ակտիվորեն զարգանում են:  Երևանում ՀՀ արտաքին գործերի նախարար Էդվարդ Նալբադյանի հետ համատեղ ասուլիսում ասաց Վրաստանի արտաքին գործերի նախարար Միխեիլ ‪Ջանելիձե‬ն:

Նա նշեց, որ իրենք քննարկել են, թե ինչպես կարող են օգտագործել այդ գործընթացները երկու երկրների միջև համագործակցության, համատեղ ծրագրերի իրականացման համար:

Վրաստանի ԱԳ նախարարի խոսքով, Էդվարդ Նալբանդյանի հետ հանդիպման ժամանակ քննարկել են երկկողմ հարաբերություններին վերաբերող տարբեր հարցեր, անդրադարձել են նաև տնտեսական համագործակցության հետագա խորացման հեռանկարներին:

«Կարևորում ենք առկա հարաբերությունների զարգացումը: Անպայման պետք է շարունակեն աշխատել միջկառավարական համագործակցության տնտեսական հարցերով  աշխատանքային խմբերը: Հաջողակ ձևաչափ է առևտրատնտեսական  հարցերի քննարկման համար: Պետք է նպաստել բիզնես սեկտորի զարգացմանը, որպեսզի երկու երկրի միջև տնտեսական համագործակցությունն էլ ավելի խորանա»,- ասաց Միխեիլ ‪Ջանելիձե‬ն:

Նրա խոսքով, հայ և վրաց ժողովուրդների միջև գոյություն ունի ավանդական բարեկամական հարաբերություններ. «Մենք պարտավոր ենք ամեն ինչ անել զարգացնելու այդ հարաբերությունները բոլոր ուղղություններով»: