Ձեր վստահելի աղբյուրը

«Սեփական հայրենիքում հակառակորդներ, թշնամիներ չփնտրել: Սեփական հայրենիքում բոլորը մերոնք են՝ լինեն ընդդիմադիր, թե իշխանություն, բոլորս միասին պետք է հզորացնենք մեր հայրենիքը: Սա է առաջին դասը, որ ստացել ենք Անդրանիկ Մարգարյանից»,- Կոմիտասի անվան զբոսայգու պանթեոնում լրագրողների հետ զրույցում ասաց ՀՀԿ մամուլի խոսնալ Էդուարդ Շարմազանովը:

Ինը տարի  առաջ այս օրը մահացել է ՀՀ նախկին վարչապետ Անդրանիկ Մարգարյանը: Կոմիտասի անվան զբոսայգու պանթեոնում այսօր քաղաքական գործչի հիշատակին հարգանքի տուրք մատուցեցին ՀՀ նախագահ Սերժ Սարգսյանը, վարչապետ Հովիկ Աբրահամյանը, Երևանի քաղաքապետ Տարոն Մարգարյանը, բարձրաստիճան այլ պաշտոնյաներ, ՀՀԿ-ականներ, մշակութային գործիչներ: Հոգեհանգստյան կարգից հետո ներկաները ծաղիկներ դրեցին Անդրանիկ Մարգարյանի շիրիմին:

Է. Շարմազանովի խոսքով, ոչ միայն քաղաքական, հասարակական, այլ նաև բարոյական դաշտում է մեծ հետք թողել Անդրանիկ Մարգարյանը:

«Նա բարությամբ էր հաղթում իր հակառակորդներին, չարությանը չարությամբ չէր պատասխանում»,- նշեց ՀՀԿ-ական գործիչը:

ՀՀԿ-ական  Գագիկ Մելիքյանի ներկայացմամբ, Անդրանիկ Մարգարյանն մշտապես պետականը, պետականությունը վեր էր դասում կուսակցական, անձնական շահերից: «Կցանկանամ, որ բոլոր ղեկավարներն այդպեսին լինեն, նրանց մոտ գերիշխի պետականը, պետականությունը»,- ասաց նա:

Երևանի փոխքաղաքապետ Կամո Արեյանը, ով Անդրանիկ Մարգարյանի վարչապետության տարիներին աշխատել է կառավարությունում, նշեց, որ նա կողմնակից էր կոլեկտիվ, համակարգված աշխատանքի,  ցանկանում էր, որ իր շուրջը մշտապես լինի համերաշխության, կայունություն:

Անդրանիկ Մարգարյանի երկվորյակ քրոջ՝ Անահիտի խոսքով, իր եղբայրը միշտ իր հետ է. «Մենք շատ կապված ենք եղել իրար հետ: Մեզ միայն ամուսնությունը բաժանեց: Ես երեք ժամով մեծ էի նրանից, չէր  հաշտվում այդ փաստի հետ: Նա բոլոր բնագավառներում մեծագույն մարդ էր»: 

Անդրանիկ Մարգարյանը ծնվել է 1951 թ.-ի հունիսի 12 Երևանում: 1967-1972 թ սովորել է Երևանի պոլիտեխնիկական ինստիտուտի տեխնիկական կիբեռնետիկայի ֆակուլտետում` ստանալով հաշվիչ մեքենաների ինժեների որակավորում: 1972-74 թթ. աշխատել է Գազի արդյունաբերության համամիութենական գիտահետազոտական ինստիտուտի Երևանի մասնաճյուղում` որպես գիտաշխատող, ավագ ինժեներ: 1977-78 թթ. Հայաստանի էներգետիկայի գիտահետազոտական ինստիտուտում գլխավոր ինժեներ է եղել: 1990-94 թթ.աշխատել է Հատուկ ծրագրերի պետական վարչությունում` որպես ինֆորմացիայի բաժնի ղեկավար: 1994-95 թթ. Աշխատել է Հայաստանի պետական ճարտարագիտական համալսարանում` որպես կրտսեր գիտաշխատող: 1995-1999թթ. Ազգային ժողովի առաջին գումարման պատգամավոր էր:

1999 թ.-ին Ա. Մարգարյանը դարձյալ ընտրվել է ԱԺ պատգամավոր, եղել մեծամասնություն կազմած «Միասնություն» խմբակցության ղեկավարը, իսկ 2000-2007 թթ. ՀՀ վարչապետ:  2007 թ. մարտի 25-ին Ա. Մարգարյանը հանկարծամահ է եղել` սրտի կաթվածից:

Քաղաքականությամբ զբաղվել է 1965 թ - ից: 1968 թ-ից եղել է խորհրդային տարիներին ընդհատակյա գործող Ազգային Միացյալ Կուսակցության անդամ, 1973 թ.-ից` ԱՄԿ խորհրդի անդամ: Հանդես է եկել խորհրդային տոտալիտար համակարգի քննադատությամբ, Հայ դատի պաշտպանության դիրքերից և հայ ժողովրդի ապագան տեսել ժողովրդավարական, անկախ պետության առկայության պայմաններում: Իր գաղափարների տարածման և ծավալած գործունեության համար 1974-ին ձերբակալվել է և դատապարտվել երկու տարվա ազատազրկման:

1992 թ-ից Հայաստանի Հանրապետական կուսակցության (ՀՀԿ) անդամ էր, 1993-1997 և 1998-2005 թթ.` ՀՀԿ խորհրդի նախագահ: 1997-98 թթ. եղել է ՀՀԿ նախագահ, 2005թ-ին դարձյալ ընտրվել է ՀՀԿ նախագահ: 1998 թ-ից Երկրապահ կամավորականների միության (ԵԿՄ) անդամ էր, այնուհետև` ԵԿՄ վարչության անդամ: Հայաստանի Հանրապետության անկախության հռչակման 15-րդ տարեդարձի կապակցությամբ, պետականության կայացման և տնտեսության զարգացման գործում ներդրած մեծ ավանդի համար ՀՀ նախագահի հրամանագրով պարգևատրվել է Սուրբ Մեսրոպ Մաշտոցի շքանշանով: Պարգևատրվել է նաև ՀՀ ՊՆ «Վ. Սարգսյան», «Գ. Նժդեհ» մեդալներով, ԵԿՄ «Վ. Սարգսյան» շքանշանով, ՀՀ Ոստիկանության «Արամ Մանուկյան» մեդալով, Ֆ. Նանսենի հիմնադրամի «Ֆ. Նանսեն» մեդալով:

Լուսանկարները՝  ՀՀ նախագահի պաշտոնական կայքից:
Panorama.am-ի լուսանկարները՝ այստեղ: