Ձեր վստահելի աղբյուրը

ՌԴ նախագահ Վլադիմիր Պուտինի խորհրդական Սերգեյ Գլազևը կարծում է, որ ռուբլու ընթացիկ փոխարժեքը  ամերիկյան դոլարի նկատմամբ իջեցված է երեք անգամ:

«Մեկ դոլարի գնողունակությունը համարժեք է մոտավորապես 23-25 ռուբլու գնողունակությանը», - «Լենտա.ռու»-ի փոխանցմամբ` հայտարարել է Գլազևը:

«Այդպիսին են Տնտեսական համագործակցության և զարգացման կազմակերպության գնահատականները, դա վիճակագրություն է: Վերցնում են ապրանքների զամբյուղ Ռուսաստանում և ԱՄՆ-ում և համեմատում են, թե որքան ապրանք է հնարավոր գնել 100 դոլարի դիմաց ԱՄՆ-ում և որքան` Ռուսաստանում», - մեկնաբանել է Գլազևը` նշելով, որ դա «լավ մշակված մեթոդոլոգիա է, որը կիրառվում է ավելի քան 50 տարի»:

Ըստ ՌԴ նախագահի խորհրդականի` Ռուսաստանի պարագայում «իդեալական կլիներ ֆիքսել ռուբլու փոխարժեքը երկար ժամանակահատվածի համար», սակայն ոչ 25 ռուբլու մակարդակում:

«Դա պետք է անել այն տատանումների մակարդակում, որոնք եղել են վերջին երկու տարիների ընթացքում` 60-80 ռուբլի»,-հավելել է տնտեսագետը` ընդգծելով, որ անհրաժեշտ է Կենտրոնական բանկին վերադարձնել շուկա` տնտեսությունը կայունացնելու համար: