Ձեր վստահելի աղբյուրը

Ընտրական օրենսգրքի նախագծի քննարկումների համար ստեղծվող 4+4+4 ֆորմատի՝ ընդդիմություն-իշխանություն-քաղաքացիական հասարակություն, բանակցություններին մասնակից քաղհասարակության ներկայացուցիչները դեռ չեն հավաքվել և չեն հստակեցրել իրենց մարտավարությունը: Այդ մասին Panorama.am-ին տեղեկացրեց այդ ֆորմատում քաղհասարակության ներկայացուցիչ ընտրված իրավապաշտպան Արտակ Զեյնալյանը: 

«Դեռ հստակ չէ՝ ինչ մարտավարություն ենք որդեգրելու, հանդիպում չի եղել, չենք քննարկել: Երբ կհստակեցնենք մեր դիրքորոշումը, հետո միայն հանդես կգանք հայտարարություններով», -հավելեց Զեյնալյանը՝ պատասխանելով մեր հարցին, թե ինչ առաջնային հարցեր է բանակցություններում բարձրացնելու քաղհասարակությունը ներկայացնող անձանց խումբը: 

Դիտարկմանը, թե արդեն իսկ հնչում են հայտարարություններ, որ 4+4+4 ֆորմատից որևէ ակնկալիք, որևէ դրական զարգացում սպասել պետք չէ, Զեյնալյանը ձեռնպահ մնաց նման հայտարարություններին գնահատական տալուց:

«Այս փուլում մենք որևէ հայտարարության չենք արձագանքելու», -ասաց նա:

Նշենք, որ 4+4+4 ֆորմատում քաղաքացիական հասարակությունն ընտրել էր հետևյալ գործիչներին, որոնք հիմնական են լինելու Սոնա Այվազյան, Արտակ Զեյնալյան, Լևոն Բարսեղյան, Տիգրան Եգորյան: Փոխարինող ներկայացուցիչներ են լինելու Ստեփան Դանիելյանը և Դանիել Իոաննեսյանը: