Ձեր վստահելի աղբյուրը

Ռուսական «Գազետա.ռու» պարբերականը ծավալուն հոդվածով անդրադարձել է ղարաբաղյան հակամարտությանը, չավարտված պատերազմի պայմաններում վերականգնվող Լեռնային Ղարաբաղին, վերաշինվող Ստեփանակերտին, ինչպես նաև հակամարտության կարգավորման բանակցային գործընթացին:

Հոդվածի հեղինակ Ալեքսանդր Ռիբինն այցելել է Լեռնային Ղարաբաղ, ծանոթացել է մայրաքաղաք Ստեփանակերտին` ընթացող վերակառուցմանը, կատարվող ներդրումներին, տնտեսական զարգացմանը, ինչպես նաև` եղել է Ադրբեջանի հետ շփման գծում:

Հրապարակման մեջ առնձնահատուկ անդրադարձ է կատարված Արցախի և Հայաստանի խաղաղ բնակչության վրա ադրբեջանական գնդակոծության և հրետակոծության հետևանքներին: 

Մասնավորապես` նկարագրված է անցած շաբաթվա ընթացքում Բերքաբեր գյուղի գնդակոծումը, ինչի հետևանքով խաղաղ բնակիչ էր վիրավորվել և մեջբերել է ՀՀ ՊՆ հայտարարությունն այդ կապակցությամբ:

«Առաջնագծի ուրվագիծը բացարձակապես չի փոխվում: Սակայն փոխվում են դիրքավորումները, հայտնվում են նոր զինատեսակներ, փոխվում են միջազգային միջնորդները և դիտորդները: Իսկ առաջնագծի հետևում` Լեռնային Ղարաբաղի տարածքում, կառուցվում են նոր շենքեր, վերանորոգվում են հին ճանապարհները, օտարերկրյա ներդրումներն օգտագործվում են տուրիզմի զարգացման  և սիրիացի փախստականներին ապաստան տրամադրելու համար», - ասվում է հոդվածում:

Հեղինակը նկարագրել է նաև ԼՂ պաշտպանական համակարգը, առաջնագծի կառուցվածքը և պաշտպանական ամրությունները:

«Ղարաբաղցի զինվորականների պնդմամբ` իրենք ԼՂՀ պաշտպանության նախարարից խիստ հրաման ունեն` առաջինը կրակ չբացել: Հրաձգային զենքին նրանք չեն պատասխանում, պատասխանում են, եթե իրենց վրա կրակում են առավել ազդեցիկ զինատեսակից», - ընդգծում է հեղինակը:

Մայրաքաղաք Ստեփանակերտի մասին` հեղինակն ընդգծում է, որ այն ընդհանրապես նման չէ խուլ ծայրագավառի. «Այն մի քանի անգամ ավելի լավ տեսք ունի, քան Հայաստանի բազմաթիվ մարզկենտրոններ»:

Հրապարակման մեջ առանձնահատուկ ուշադրություն է դարձված  ԼՂ տուրիստական պոտենցյալին և նշված է, որ 2015թ-ի ընթացքում Ղարաբաղ է այցելել ավելի քան 10 հազար զբոսաշրջիկ: