Ձեր վստահելի աղբյուրը

Այսօր առավոտյան ԱԺ պատգամավոր Նիկոլ Փաշինյանը այցելել է Հրազդանի քաղաքապետարան հանդիպելու գործող քաղաքապետ Արամ Դանիելյանի հետ, բայց նրան աշխատավայրում չի գտել:

«Այսօր այցելեցի Հրազդանի քաղաքապետարան: Հույս ունեմ այս այցից գործող քաղաքապետ Արամ Դանիելյանը շատ չի ճնշվի: Ես նրան անկեղծորեն առողջություն եմ մաղթում և մեծ հաջողություններ՝ նոր աշխատանքի փնտրտուքի գործում:

Օդում կախված լուրերի համաձայն, ապրիլի 17-ի ընտրություններից հետո, նրան Կոտայքի մարզպետի տեղակալ են նշանակելու:

Հույս ունեմ՝ նա սերտորեն կհամագործակցի նոր քաղաքապետի հետ, և 14 տարիների ընթացքում իր ձեռք բերած դրական (միայն դրական) փորձը կներդնի քաղաքի հետագա զարգացման գործում:

Հ.Գ. Ցավոք այսօր պարոն Դանիելյանի հետ շփվելու առիթ չունեցա: Ինչքան հասկացա, նա ժամանակին աշխատանքի ներկայանալու սիրահար չէ: Սա ասում եմ որպես վերադաս մարմնի անդամ՝ ԱԺ պատգամավոր:

Լուսանկարը՝ Հրազդանի քաղաքապետարանի օպերատիվ-հետախուզության և զարհուրելի ճնշումների դեմ պայքարի բաժնի ավագ մասնագետ՝ 006-ի (անուն-ազգանունը օպերատիվ գաղտնիք լինելու պատճառով չի հրապարակվում», -իր ֆեյսբուքյան էջում գրել է Նիկոլ Փաշինյանը՝ տեղադրելով Արամ Դանիելյանի աշխատասենյակի դռների մոտ արված լուսանկարը:

Նշենք, որ ապրիլի 17-ին կայանալիք Հրազդանի քաղաքապետի ընտրություններում ընտրապայքարն հիմնականում ընթանալու է առաջադրված թեկնածուներ Սասուն Միքայելյանի և գործող քաղաքապետ Արամ Դանիելյանի միջև: